İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 458 Hüküm no: 443 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vartan v. Kalus’un, kendisini şikâyet ederek haksız yere kürek cezasına mahkum edilmesine sebep oldukları iddiasıyla Francalacı Yani, Artin ve Marat aleyhine açtığı tazminat davasının meşru olmadığı Francalacı fırını, 1.650 guruş nizâ‘ı Ma‘rûz Sâhib-i arzuhâl Vartan v. Kalus nâm zimmî meclis-i şer‘-i hatîrde derûn-ı arzuhâlde isimleri mastûr francalacı tâifesinden Yani v. Mihal asâleten ve Artin v. Mardıros zimmî tarafından husûs-ı âti’l-beyânda vekîl olduğu mersûm Yani ve Marat v. Ohan zimmîler şehâdetleriyle sâbit olan Kalus v. Kigork ve Ağik v. Ohan nâm zimmî tarafından kezâlik husûs-ı âtîde vekîl olduğu mersûmân Yani ve Kalus zimmîler şehâdetleriyle sâbit olan mesfûr Marat zimmî muvâcehelerinde Habbâzân Kethudâsı Mustafa Ağa ve bi’l-cümle nizâm ustaları hâzır oldukları hâlde ben bundan akdem İstanbul hâricinde Davudpaşa Sarayı nâm mahâlde kâin bir bâb hâs fırında müşâhereten müstecir olup derûnunda francala tabh ve i‘mâl ve ibâdullâha bey‘le ta‘ayyüş eder iken bundan akdemce ihdâs olunan francala fırınlarının sedd ü bend olunması ve kadîm olan fırınların ibkāsı bâbında sudûr eden hatt-ı hümâyûn-ı mevhibet-makrûn mûcebince benim müstecir olduğum hâs fırın ile sâir muhdes olan francalacı fırınları sedd ü bend olundukdan sonra ben ve sâirleri rikâb-ı hümâyûna arzuhâlle fırınlarımızın küşâdını istid‘â eylediğimiz hengâmda mersûmûn Yani ve Artin ve Marat zimmîler sâir francalacı tâifesini kendilere terfîk edip benden iştikâ ve bâ-fermân-ı âlî li-ecli’t-tedîb küreğe vaz‘ etdirmeleriyle ben dahi yetmiş beş gün kürekde mahbûs olup malımdan bin altı yüz elli guruş harc ü sarfla kürekden ıtlâk ve sebîlim tahliye olunmuş idi. El-hâletü hâzihî masrûfum olan meblağ-ı merkūmu zimmîyyûn-ı mersûmûn bana mallarından zâmin olsunlar deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmamağla müdde‘î-i mesfûr Vartan zimmî da‘vâ-yı mezkûresiyle mersûmûndan herbirine bî-vech-i şer‘î mu‘ârazadan men‘ olunduğu İstanbul Mahkemesi’nden huzûr. Fî-selhi C sene [1]223.