İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 472 Hüküm no: 457 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Cafer Beşe’nin vârisleri tarafından Çatal Fırın ve ona bağlı değirmen gediğinin Kuzman v. Doyko’ya satıldığı Çatal fırın mâddesi Ma‘rûz İstanbul’da Kadırga Limanı nâm mahâlde vâki‘ Çardaklı fırında sâkin iken bundan akdem vefât eden habbâz tâifesinden Cafer Beşe b. İbrahim’in verâseti zevce-i menkûha-i metrûkesi Rukiye bt. Mehmed nâm hatun ile sulbî kebîr oğlu İbrahim ve sagīr oğlu Süleyman’a ba‘de’l-inhisâr ashâb-ı arzuhâl kendi nefsinden asîl ve vâlidesi zevce-i mezbûre Rukiye Hatun tarafından husûs-ı âtîde vekîl-i olduğu zâtını ârifân Ferhad Beşe b. İsmail ve Ömer Beşe b. Hüseyin nâm kimesneler şehâdetleriyle sâbit olan mezbûr İbrahim ve sagīr-i merkūm Süleyman’ın ammi ve tesviye-i emrine min-kıbeli’ş-şer‘ vasîyy-i mansûbu diğer Süleyman Beşe b. el-mezbûr İbrahim nâm kimesneler Habbâzân Kethudâsı Mustafa Ağa ve bi’l-cümle nizâm ustaları hâzır oldukları hâlde evvelâ bi’d-defa‘ât Çarşamba günü arz odasında huzûr-ı hazret-i sadâret-penâhîde ve ba‘dehû du‘âhânemizde ma‘kūd meclis-i şer‘-i münîrde habbâz tâifesinden olup İstanbul’da Kadırga Limanı kurbünde Çatal fırında mütemekkin derûn-ı arzuhâlde mersûmü’l-ism Kuzman v. Doyko nâm zimmî muvâcehesinde mârrü’z-zikr Çatal fırın ve ana merbût dört horoslu bir bâb değirmen derûnunda mevcûde beyne’l-hıref gedik ta‘bîr olunur on altı re’s bârgir ve ona isâbet eden sâir âlât-ı lâzıme-i ma‘lûme ve dört re’s küfeci bârgiri mersûm Kuzman zimmînin babası Doyko nâm zimmînin yedinde müstakıllen mülkü iken zimmî-i mersûm kapan tüccârına bin beş yüz guruş ve cânib-i mîrîye dört bin otuz üç guruş ve Sakızlı Mehmed Ağa’ya karzdan bin guruş ki cem‘an altı bin beş yüz otuz üç guruş deyni olduğu hâlde müflisen diyâr-ı âhara firâr etdikden sonra habbâzân esnâfının yedlerinde olan fermân-ı âlî-şân mûcebince gedik ta‘bîr olunan âlât-ı lâzıme-i mezkûreyi semen-i misliyle âhara bey‘e ve semeninden düyûn-ı mezkûreyi edâya kıbel-i şer‘den vasî ve kayyım nasb ü ta‘yîn olunan habbâzân kethudâsı âlât-ı lâzıme-i muharrere-i mezkûreyi babam mûrisimiz müteveffâ-yı merkūm Cafer Beşe’ye hayatında altı bin beş yüz otuz üç guruş semen tesmiyesiyle bi’l-vesâye bey‘ ü temlik ve teslîm ve semenini cânib-i mîrîye ve kapan tüccârına ve mezbûr Mehmed Ağa’ya edâ etmek üzere bi’l-vesâye emr ve tevkîl eylediğinde babam mûrisimiz müteveffâ-yı mezbûr dahi hayatında ba‘de’l-iştirâ ve’t-temellük kapan tüccârına olan meblağ-ı merkūm bin beş yüz guruş ve mezbûr Mehmed Ağa’ya meblağ-ı mezkûr bin guruş tamamen ve cânib-i mîrîye dahi bin yüz seksen üç guruş ki cem‘an üç bin altı yüz seksen üç guruşunu edâ ve teslîm bâkī zimmetinde cânib-i mîrîye iki bin sekiz yüz elli guruş deyni kalmış iken hâlâ biz bi’l-asâle ve bi’l-vekâle ve bi’l-vesâye gedik ta‘bîr olunan yirmi re’s bârgir ve sâir âlât-ı lâzıme-i mezkûreyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin altı bin yüz guruşa mersûmân Kuzman zimmîye bey‘ ve temlik ve teslîm eylediğimizde ol dahi ba‘de’l-iştirâ ve’t-temellük ve’t-tesellüm semen-i mezkûr altı bin yüz guruşun iki bin iki yüz elli guruşunu bize ve bin beş yüz guruşun emrimizle cânib-i mîrîye zimmî-i müşterî-i mersûm def‘ ü teslîm biz dahi yedinden ahz ü kabz ve mâ‘adâsı olan iki bin üç yüz elli guruşun bin üç yüz elli guruşunu cânib-i mîrîye ve beşer yüz guruşdan bin guruşunu dâyinlerimiz işbu hâzırân bi’l-meclis fırın-ı mezkûr mutasarrıfı Teberdâr el-Hâc Osman Ağa ve Bektaş Ağa’ya edâ etmek üzere [66b] ihâle ve herbirimiz bi’l-asâle ve bi’l-vekâle ve bi’l-vesâye tarafımızdan emr ve tevkîl eylediğimizde mersûm Kuzman zimmî dahi vech-i meşrûh üzere edâya müte‘ahhid olmağla mebî‘-i mezkûrun tağrîr ve gabnine ve bi’l-cümle gedik-i mezkûr husûsuna müte‘allika âmme-i de‘âvîden tarafeynden herbirimiz âharın zimmetini kabûlü hâvî ibrâ ve iskāt eyledik ba‘de’l-yevm sâlifü’l-beyân fırın ve ona merbût dört horoslu değirmen derûnlarında mevcûde gedik ta‘bîr olunan on altı re’s bârgir ve sâir âlât-ı lâzıme-i ma‘lûmede benim müvekkile-i mezbûrenin ve sagīr-i merkūmun kat‘a alâka ve medhalimiz kalmamışdır deyü ba‘de’l-ikrâr ve’t-tasdîk gedik-i mezkûr mersûm Kuzman zimmînin mülk-i müşterâsı olmağla zabt ü tasarrufi’çün kalemine kayd ve yedine sûret i‘tâ buyurulması iktizâ eylediği İstanbul Mahkemesi’nden huzûr. Fî 5 Receb sene [12]23.