İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 474 Hüküm no: 458 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoğurtçu Ahmed Beşe ve ortakları Üstüyan ve Atnaş’ın alacakları süt için peşinen ödedikleri iki bin beş yüz kuruştan Tacir Lütfullah Ağa’dan altı yüz otuz altı guruş otuz iki buçuk para alacakları olduğu 636 guruş 32,5 para hüküm Ma‘rûz Ashâb-ı arzuhâl kaymakçı ve yoğurtçu esnâfından Ahmed Beşe b. Mustafa kendi nefsinden asâleten ve şerîki Üstüyan v. Tariko zimmî tarafından husûs-ı âtîde vekîl-i müsbet-i şer‘îsi olmağla vekâleten ve âhar şerîkleri Atnaş v. Duka zimmî asâleten herbiri meclis-i şer‘-i münîrde Kapan-ı dakīk tüccârından ve Havâss-ı Refî‘a Kazâsı’na muzâfe Terkos Nâhiyesi’ne tâbi‘ Bosna karyesinde kâin çiftlik mutasarrıfı derûn-ı arzuhâlde mezkûrü’l-ism el-Hâc Hafız Lütfullah Ağa b. el-Hâc Yusuf nâm kimesne muvâcehesinde hâssa yoğurtçubaşısı ve esnâf-ı merkūme kethudâsı ve sâirleri hâzır oldukları hâlde mezbûr el-Hâc Hafız Lütfullah Ağa zikr olunan çiftlik mer‘asında ra‘y olunan sağman ta‘bîr olunur ağnâmlarından hâsıl olan südlerini bize bey‘ etmek için ber-mu‘tâd peşînen mâl ve şirketimizden ve yedimizden iki bin beş yüz guruşumuz ahz ü kabz eyledikden sonra işbu sene-i mübâreke rûz-ı Hızır’ından Temmuz evâsıtına gelinceye değin cem‘an yedi bin elli yedi vakıyye süd[ü] çiftlik-i mezkûr mandırasından bize teslîm biz dahi ahz etmemizle mandıracı kethudâsı ve mandıracılar ve çiftlikân ashâbıyla esnâf-ı hâzırûn-ı merkūmûn beynlerinde ma‘rifet-i şer‘le mukaddemâ kat‘-ı fiyât olunduğu üzere aşağı bâzâr ta‘bîr olunur beher vakıyyesi beşer buçuk paranın üzerine işbu sene-i mübârekede şiddet-i şitâ sebebiyle külliyetlü ağnâm helâk olduğuna mebnî ikişer para zamla bi’t-terâzî yedişer buçuk para semeni olmak üzere iktizâ eden cem‘an bin üç yüz yirmi üç guruş yedi buçuk para bâlâda mezkûr ber-vech-i peşîn makbûzu olan iki bin beş yüz guruşun ol-mikdârına takas ve mahsûb ile tenzîl olundukda bâkīsi olan bin yüz yetmiş altı guruş otuz iki buçuk paranın beş yüz guruşunu nakden bize def‘ ü teslîm ve kırk guruş dahi mezbûrûn iştirâ ve kabz olunan ma‘lûmü’l-keyl şa‘îr semenine mahsûben istifâ olunmağla ol-vechile mâ‘adâsı olan altı yüz otuz altı guruş otuz iki buçuk parayı mezbûr el-Hâc Hafız Lütfullah Ağa’dan bi’l-asâle ve bi’l-vekâle istirdâd ederiz deyü da‘vâ etdiklerinde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ve tasdîk edip lâkin ben bâlâda zikr olunduğu üzere ma‘rifet-i şer‘ ve cümle erbâb-ı vukūf ma‘rifetleriyle râbıta-i bend olan fiyât üzere yedişer buçuk para hesâbıyla râzı olmam beher vakıyyesini dokuzar paradan mutâlebe ederim demesi müvecceh olmadığından mâ‘adâ süd narhı nizâmının ihtilâline mûcib olmağla kelâmına iltifât olunmayıp makbûzu olan meblağ-ı merkūm iki bin beş yüz guruşdan gayr ez-tenzîl bâkīsi olan meblağ-ı mezkûr altı yüz otuz altı guruş otuz iki buçuk paranın müdde‘ûn-ı asîl ve vekîl-i merkūmûna redd ü teslîmi iktizâ eylediği İstanbul Mahkemesi’nden huzûr. Fî 9 Receb sene [1]223.