İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 488 Hüküm no: 475 Orijinal metin no: [69a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yüksekliğinin emsaline göre fazla olduğu yolundaki şikâyet üzerine menzil inşaatının yerinde keşfolunduğu Keşif Ma‘rûz Sâdır olan fermân-ı âlîlerine imtisâlen cânib-i şer‘-i münîrden mürsel keşif nâibimiz Merhabâzâde Mahmud Efendi hâssa mi‘mârı hulefâsından es-Seyyid Mustafa ve Sofu Mustafa halîfeler ile derûn-ı arzuhâlde mezkûr İstanbul’da Langa kurbünde Kâtib Kasım mahallesinde vâki‘ nezâret-i dâ‘îlerinde âsûde evkāfdan Meryem Ana Kenîsesi Avârız Vakfı’ndan münâza‘un-fîh olan henüz kafes olmuş nâ-tamam bir bâb menzile varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm etdikde ashâb-ı arzuhâl Arotin v. Kazar ve Karabet v. Kazar zimmîler ile şahsı mu‘arrefe olan Lusya bt. Matos nâm Nasrâniye meclis-i ma‘kūd-ı mezkûrda derûn-ı [69b] arzuhâlde mastûr kendi nefsinden asîl ve Anadolu bt. Ovannes ve kız karındaşı Nazlı bt. Matos nâm Nasrâniye taraflarından husûs-ı âtîde vekîl-i şer‘îleri Ovannes v. Matos zimmî muvâcehesinde vakf-ı merkūm mütevellîsi Asvador v. Ohannes zimmî tarafından mürsel Ohannes v. Bedros zimmî hâzır olduğu hâlde mesfûrûn bu esnâda menzil binâsına şürû‘ eyledikleri kafes olmuş kiremidi nâ-mevzû‘ ebniyenin kadd-i irtifâ‘ı ebniye husûsunda bâ-fermân-ı âlî re‘âyâya verilen ruhsat-ı aliyyeden ziyâde ve ol-vechile bizim menzillerimize zarar-ı şer‘îsi olduğundan mâ‘adâ mugāyir-i emr-i âlî terfî‘ eyledikleri binânın bir zirâ‘ altı parmak kaddi kat‘ olunmak matlûbumuzdur deyü da‘vâ etdiklerinde mi‘mârân-ı mezbûrân ebniye-i mezkûrenin kadd-i irtifâ‘ını mesâha eylediklerinde on bir zirâ‘ altı parmak olup re‘âyâya verilen ruhsat-ı aliyyeden bir zirâ‘ altı parmak ziyâde ve henüz kafes olmuş kiremidi nâ-mevzû‘ olduğunu mi‘mârân-ı mezbûrân ihbâr eylediklerini mevlana-yı mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip ba‘de’l-inhâ ebniye-i mezkûrenin bir zirâ‘ altı parmak ziyâdesi mugāyir-i fermân-ı âlî olmağla ziyâde-i mezkûrenin kat‘ı ve gerek alâ-hâlihî ibkāsı husûsu re’y-i rezîn-i âsafânelerine menût olduğu İstanbul Mahkemesi’nden huzûr. Fî 19 Receb sene [12]23.