İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 487 Hüküm no: 474 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veliyüddin ve İsper’in Bornova Nahiyesi’nde 56. Yeniçeri Ortaları Bölüğü Vakfı’na ait olan kasap dükkânlarında hayvan kesip satmalarına nahiye voyvodalarının engel olmasının yasal olmadığı Burunova Nâhiyesi’nde kasab dükkânı Ma‘rûz Sâdır olan fermân-ı âlîlerine imtisâlen arzuhâl ve derkenârlara nazar olundukda Dergâh-ı âlî yeniçerileri ortalarından elli altı bölüğün vakfı müsakkafâtından olup İzmir Kazâsı’na muzâfe Burunova Nâhiyesi’nde vâki‘ bir bâb kasab dükkânıyla sebzehâne derûnunda mevcûde revgan-ı zeyt değirmenine bi’l-icâreteyn ber-vech-i iştirâk mutasarrıflar olan sâhibey-i arzuhâl Veliyüddin nâm kimesne ile İsper nâm zimmî dükkân-ı mezkûrda ganem ve sığır zebh ve narh-ı cârîsi üzere ibâdullâha füruht ve ol-vechile ta‘ayyüş ederler iken nâhiye-i merkūme voyvodaları Ömer ve Abdullah nâm kimesneler zikr olunan Burunova Nâhiyesi hâss-ı hümâyûn mülhakātı olmağla nâhiye-i merkūmeden sığır ve ganem kasablığı rüsûmâtı mukāta‘a-i mezbûreye hâsıl kayd olunmuşdur diyerek kendileri taraflarından zebh ve ibâdullâha diledikleri bahâ ile füruht ve sâhibey-i arzuhâl kasablıkdan men‘ ve gadra ibtidâr eyledikleri beyânıyla voyvoda-i mezbûrânın vâki‘ olan te‘addîleri men‘ ü def‘ olunmak bâbında mübâşirli bir kıt‘a emr-i âlî sudûrunu istid‘â ve istirhâm etmeleriyle zikr olunan sığır ve ganem kasablığı rüsûmâtına dâir kayd-ı mahallî[de] sarâhat bulunmadığı defterhâne-i âmire derkenârından müstebân olup bu sûretde voyvoda-i mezbûrânın vech-i meşrûh üzere sığır ve ganem kasablığına ve rüsûmât mutâlebesiyle te‘addîleri mugāyir-i defter-i hâkānî olduğundan mâ‘adâ kasablığı kendilere hasr ve tahsîs dahi men‘-i inhisâr-ı bey‘ ü şirâ hakkında mukaddemâ şeref-yâfte-i sudûr olan mübârek hatt-ı hümâyûn-ı adâlet-makrûn mazmûn-ı münîfine muhâlif olmağla voyvoda-i mezbûrânın ber-minvâl-i muharrer hilâf-ı defter-i hâkānî ve mugāyir-i hatt-ı hümâyûn kasablık husûsuna te‘addîleri vâki‘ ise mübâşir ma‘rifetiyle mahâllinde şer‘le rü’yet ve te‘addîleri men‘ ü def‘ olunmak bâbında İzmir kādısına hitâben bir kıt‘a emr-i celîlü’ş-şân sudûru muktezâ-yı hâl olduğu İstanbul Mahkemesi’nden huzûr. Fî 19 Receb sene [1]223.