İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 494 Hüküm no: 481 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Hüseyin’in sattığı çörekçi dükkânı gediği hissesi bedelinden Gözlemeci Mustafa Usta’dan altı yüz doksan yedi kuruş alacağı olduğu 690 [697] guruş hüküm Ma‘rûz Sâhib-i arzuhâl çörekçi esnâfından es-Seyyid el-Hâc Hüseyin b. Osman meclis-i şer‘-i münîrde derûn-ı arzuhâlde mezkûrü’l-ism Gözlemeci Mustafa Usta b. Mehmed muvâcehesinde İstanbul’da Tahte’l-kal‘a nâm mahâlde vâki‘ bir bâb çörekçi dükkânı derûnunda mevcûde gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla mâlik olduğum otuz sehm hisse-i şâyi‘âmîz bin iki yüz yirmi bir senesi Şevvâl’inin yedinci günü iki bin guruş semen tesmiyesiyle mezbûr Mustafa Usta’ya bâ-hüccet-i şer‘iye bey‘ ve temlik ve teslîm ol dahi ba‘de’l-iştirâ ve’t-tesellüm semen-i merkūmun beş yüz guruşunu nakden bana def‘ ü teslîm ve mâ‘adâ bin beş yüz guruş dahi zimmetinde deyni olduğunu nâtık karz unvânıyla işbu bir kıt‘a temessükü yedime i‘tâ etdikden sonra meblağ-ı mezbûrun sekiz yüz üç guruşunu ceste ceste bana edâ ve teslîm etmekle bâkīsi olan altı yüz doksan yedi guruşu merkūm Mustafa Usta’dan hâlâ taleb ederim deyü da‘vâ etdikde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf edip lâkin ben âlât-ı lâzıme-i mezkûre hissesini müdde‘î-i mezbûrdan iştirâ ve kabz etdikden sonra bundan akdemce harîkde dükkân-ı merkūm muhterik olup ben dükkân-ı mezkûru idareye kudretim olmayıp şirâsına nâdim olmamla semen nâmıyla medfû‘um olan mikdâr-ı mezkûru bana verip hisse-i mezkûreyi geri alsın dediği kelâmı def‘a sâlih cevâb-ı şer‘î olmamağla iltifat olunmayıp ikrârı mûcebince lâzım gelen meblağ-ı bâkī-i merkūm altı yüz doksan yedi guruşu müdde‘î-i mezbûr es-Seyyid el-Hâc Hüseyin’e edâsıyla merkūm Mustafa Usta ilzâm olunduğu İstanbul Mahkemesi’nden huzûr. Fî 20 Receb sene [1]223.