İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 495 Hüküm no: 482 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serpohi bt. Minas’ın tasarrufunda olan Kumkapı’daki balıkçı dükkânlarından kiracıları olan zimmîleri sebepsiz yere çıkarmasının uygun olmadığı Balıkçı gediği mâddesi Ma‘rûz Ashâb-ı arzuhâl balıkçı esnâfından Kirlos v. Foti ve Simyon v. Kostantin ve Parsam v. Selos nâm zimmîler Çarşamba günü arz odasında huzûr-ı hazret-i sadâret-penâhîde ma‘kūd meclis-i şer‘-i münîrde derûn-ı arzuhâlde ismi mastûr Serpohi bt. Minas nâm Nasrâniyenin kebîre kızı ve tarafından husûs-ı âtîde vekîl olduğu şahsını bilir Gabril v. Serkiz ve Arzuman v. Serkiz nâm zimmîler şehâdetleriyle sâbit olan Garyana bt. Abraham nâm Nasrâniye muvâcehesinde İstanbul’da Kumkapı dâhilinde vâki‘ birbirine muttasıl üç bâb taze balıkçı dükkânları müvekkile-i mersûme Serpohi Nasrâniyenin bi’l-icâreteyn taht-ı tasarrufunda ve bizler dekâkin-i mezkûrenin herbirine müddet-i vâfireden beri şehriye beşer guruş otuzar para kirâ ile müstecir olup yedimizde olan işbu fermân-ı âlî-şânda zikr ü beyân olunduğu üzere Kumkapı’da sekiz bâb ve mahâll-i sâirede otuz yedi bâb ki cem‘an kırk beş bâb taze balıkçı dükkânları kadîmü’l-eyyâmdan beri balıkhâneden hisse alıp ibâdullâha bey‘le ta‘ayyüş ve Tersâne-i âmire’ye müretteb olan mellâh teklifi ve amele ücretlerinden [70b] dekâkin-i mezkûreye tarh ve tahmîl olunan mâhiyye onar guruş maktû‘ hisselerimizi kabza memûra teslîm edegelip ol-vechile dükkânlarımız ziyâde ve noksân olmayarak derûnlarında mevcûde gedik âlâtları beynimizde mer‘î ve mu‘teber olarak mülklerimiz olup işbu müstecirleri olduğumuz üç bâb dekâkin-i mezkûre emr-i âlîde mastûr olan sekiz bâb dekâkinden ma‘dûd ve yüz seneden mütecâviz müddetden beri balıkçı dükkânı olmağla dekâkin sâhibesi müvekkile-i mersûmeye kirâları mâh be-mâh cevr u ezâ etmeksizin edâ olundukça bizim ve gerek eslâfımızdan olan gedik mâliklerinin bilâ-mûcib ihrâclarına ta‘arruzları mesbûk değil iken müvekkile-i Nasrâniye-i mesfûre gedik bahâ alarım ve kirâ-yı kadîmini artırırım zu‘muyla âhar san‘at erbâbına îcâr etmek mülâhazasıyla bir takrîb bizi ihrâc ve dekâkin-i mezkûreyi müstakıl terk ve ta‘tîl ve bizi kâr ü kisb ve ta‘ayyüşümüzden men‘ birle mağdûriyetimize bâ‘is ve müretteb olan amelenin noksâniyetine bâdî bir keyfiyet olmağla suâl olunup kadîmî vech üzere şehriye kirâları alıp dekâkin-i mezkûrede ke’l-evvel taze balık bey‘imize mümâna‘at etmemek üzere müvekkile-i Nasrâniye-i mersûmeye tefhîm olunmak murâdımızdır deyü istirhâm etmeleriyle Nasrâniye-i mersûme istintâk olundukda fi’l-hakīka dekâkin-i mezkûre sâlifü’l-beyân sekiz bâb dekâkinde dâhil ve yüz seneden mütecâviz müddetden beri taze balıkçı dükkânları olup ve zimmîyyûn-ı mersûmûnun ber-vech-i muharrer beşer guruş otuzar para kirâ ile müstecirleri olduğunu mukırre ve mu‘terife olup lâkin mücerred dekâkin-i mezkûrenin lüzûmu olmağla mesfûrûnu ihrâc ve mukaffelen terk ve ta‘tîl etmişdir deyip ve Nasrâniye-i mersûmenin takrîri üzere mâh be-mâh kirâlarını bilâ-rencîde ahz eder iken müstecirleri zimmîyyûn-ı mesfûrûnu ızrâr kasdıyla bilâ-mûcib ihrâclarına ta‘arruz muhill-i nizâm olup sâire sirâyet ile umûr-ı mühimmenin ta‘tîline bâdî ve ihtilâl-i [nizâm-ı] esnâfa bâ‘is olmağla ber-mûceb-i emr-i âlî zimmîyyûn-ı mesfûrûn dekâkin-i mezkûrelerde kemâ-fi’s-sâbık iskân olunmak iktizâ eylediği İstanbul Mahkemesi’nden huzûr. Fî 15 Receb sene 1223.