İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 497 Hüküm no: 484 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aci Zakar’ın Uzunçarşı yakınlarındaki Kapılı Mahzen’de sahip olduğu tuhafcı gediğini oğlu Markos’a iki bin kuruşa sattığı Tuhafcı gediği bey‘i Ma‘rûz Başmuhasebe’de mukayyed tuhafcı ve fincancı gediklerinden olup İstanbul’da Uzunçarşı kurbünde İbrahim Paşa Câmi‘-i şerîfi nezdinde Şıkk-ı Evvel Defterdârı esbak Mustafa Reşid Efendi konağı karşısında kâin Abraham mahzenine muttasıl köşe başında Kapılı Mahzen demekle meşhûr bir bâb tuhafcı ve fincancı mahzeni derûnunda mevcûde beyne’l-hıref tuhafcı gediği ta‘bîr olunan âlât-ı lâzıme-i ma‘lûmeye bâ-sûret-i hümâyûn mâliki Aci Zakar zimmî meclis-i şer‘-i hatîrde sulbî kebîr oğlu Markos zimmî muvâcehesinde takrîr-i kelâm edip bâlâda mezkûr bir bâb tuhafcı mahzeni derûnunda mevcûde gedik ta‘bîr olunur akd-i âti’z-zikrin sudûruna değin müstakıllen yedimde mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan oğlum mersûm Markos zimmîye iki bin guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl edip semen-i merkūm iki bin guruş mutâlebesine ve bi’l-cümle gedik husûsuna müte‘allika âmme-i da‘vâdan oğlum mersûmun zimmetini kabûlü hâvî ibrâ ve iskāt eyledim fîmâ-ba‘d zikr olunan tuhafcı mahzeni gediğinde benim alâka ve medhalim kalmayıp oğlum müvekkil-i mersûm Markos zimmînin mülk-i müşterâsı olmuşdur dedikde ol dahi tasdîk etmeğin gedik-i mezkûrun kaydı kaleminde bâyi‘-i mersûm Aci Zakar zimmî üzerinden ref‘ ü ilgā ve oğlu müşterî-i mersûm Markos zimmî üzerine kayd ü tahrîr ve yedine sûret i‘tâ olunmak bâbında istid‘â-yı inâyet eylediği İstanbul Mahkemesi’nden huzûr. Fî 19 Receb sene [1]223.