İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 498 Hüküm no: 485 Orijinal metin no: [70b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zakar’ın Uzunçarşı yakınlarındaki tuhafcı mahzenindeki tuhafcı gediğini oğulları Markos ve Mardıros’a dört yüz kuruşa sattığı Tuhafcı gediği bey‘i Ma‘rûz Başmuhasebe’de mukayyed tuhafcı ve fincancı gediklerinden olup İstanbul’da Uzunçarşı kurbünde İbrahim Paşa Câmi‘-i şerîfi karşısında Şıkk-ı Evvel Defterdârı esbak Mustafa Reşid Efendi konağı karşısında kâin tuhafcı ve fincancı mahzeni derûnunda mevcûde beyne’l-hıref tuhafcı gediği ta‘bîr olunan âlât-ı lâzıme-i ma‘lûmeye bâ-sûret-i hümâyûn mâliki Zakar zimmî meclis-i şer‘-i hatîrde sulbî kebîr oğulları [71a] Markos ve Mardıros zimmîler muvâcehelerinde takrîr-i kelâm edip bâlâda mezkûr bir bâb tuhafcı mahzeni derûnunda mevcûde gedik ta‘bîr olunur akd-i âti’z-zikrin sudûruna değin müstakıllen yedimde mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan oğullarım mersûmân Markos ve Mardıros zimmîlere ale’l-iştirâki’s-seviyy dört yüz guruşa bey‘ ve temlik ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabûl edip semen-i merkūm dört yüz guruş mütâlebesine ve bi’l-cümle gedik husûsuna müte‘allika âmme-i da‘vâdan oğullarım mersûmânın zimmetlerini kabûllerini hâvî ibrâ ve iskāt eyledim fîmâ-ba‘d zikr olunan tuhafcı mahzeni gediğinde benim kat‘a alâka ve medhalim kalmayıp oğullarım mersûmân Markos ve Mardıros zimmîlerin ale’l-iştirâki’s-seviyy mülk-i müşterâları olmuşdur dedikde onlar dahi tasdîk etmeğin gedik-i mezkûrun kaydı kaleminde bâyi‘-i mersûm Zakar zimmî üzerinden ref‘ ü ilgā ve oğulları müşteriyân-ı mersûmân Markos ve Mardıros zimmîler üzerlerine kayd ü tahrîr ve yedlerine sûret i‘tâ olunmak bâbında istid‘â-yı inâyet eylediği İstanbul Mahkemesi’nden huzûr. Fî 19 Receb sene [1]223.