İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 515 Hüküm no: 504 Orijinal metin no: [73b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manil v. İsayi’nin papuççu gediğini kendisine devretmeye söz veren Papuççu Haçador’a ödediği dört yüz elli kuruşun söz konusu devir gerçekleşmediği için iadesi 450 guruş hüküm Ma‘rûz Derûn-ı arzuhâlde mastûrü’l-ism Manil v. İsayi nâm zimmî meclis-i şer‘-i hatîrde İstanbul’da Vefa Ahırı’nda papuş dikici tâifesinden sâhib-i arzuhâl Haçador v. İranos zimmî muvâcehesinde târih-i i‘lâmdan üç ay mukaddem mesfûr Haçador zimmî mârrü’z-zikr Vefa Ahırı’nda kâin bir bâb papuşcu odası derûnunda mevcûde bâ-temessük-i mütevellî mutasarrıf [74a] olduğu papuşcu gediğini bin iki yüz guruş bedel-i mukāvelesiyle bana ferâğa ta‘ahhüd etmekle ben dahi bedel-i ferâğ olan meblağ-ı mezbûra mahsûben malımdan zimmî-i mersûma ber-vech-i peşîn dört yüz elli guruş verip mâ‘adâsını tedârük ve teslîm birle gedik-i mezkûru bâ-re’y-i mütevellî tefevvüz etmek benim için müyesser olmamağla ber-minvâl-i muharrer bedel nâmıyla medfû‘um olan meblağ-ı merkūm dört yüz elli guruşu mersûm Haçador zimmîden istirdâd murâdımdır deyü da‘vâ etdikde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin mûcebince makbûzu olan meblağ-ı mezbûr dört yüz elli guruşu müdde‘î-i mesfûr Manil zimmîye redd ü teslîm etmek üzere mersûm Haçador zimmî ilzâm olunduğu İstanbul Mahkemesi’nden huzûr. Fî 17 B sene [12]23.