İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 515 Hüküm no: 503 Orijinal metin no: [73b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gelibolulu Molla Mustafa’nın sattığı yelken bezi bedelinden Yelkenci Halil’den bin kırk dokuz kuruş alacağı olduğu 1.049 guruş hüküm Ma‘rûz Sâhib-i arzuhâl Gelibolulu Molla Mustafa b. el-Hâc Abdülbâki bi’t-terâzî du‘âhâne-i dâ‘îlerinde ma‘kūd meclis-i şer‘-i münîrde derûn-ı arzuhâlde mezkûrü’l-ism yelkenci esnâfından es-Seyyid Halil b. Ömer muvâcehesinde mezbûr es-Seyyid Halil zimmetinde bundan akdem malımdan ve yedimden iştirâ ve kabz eylediği zirâ‘ ve fiyâtı beynimizde ma‘lûm yelken bezleri semeninden ba‘de külli’l-hesâb sahhu’l-bâkī bin kırk dokuz guruş alacak hakkım olmağla hâlâ taleb ederim deyü da‘vâ etdikde ol dahi cevâbında kaziyye minvâl-i meşrûh üzere olup meblağ-ı mezbûr el-yevm zimmetinde müdde‘î-i merkūma deyni olduğunu tâyi‘an ve kat‘iyyen ikrâr ü i‘tirâf etmeğin alâ-mûcibi i‘tirâfihî meblağ-ı merkūm bin kırk dokuz guruşu müdde‘î-i mezbûr Molla Mustafa’ya edâsıyla merkūm es-Seyyid Halil ilzâm olunduğu İstanbul Mahkemesi’nden huzûr. Fî 27 B sene [12]23.