İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 516 Hüküm no: 506 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uygunsuz hareketleri görülen kapı âletçi esnafından Ayvaz ve kardeşinin kapı âletçi esnaf kethuda, yiğitbaşı ve ustaları tarafından esnaflıktan çıkarılmalarının talep edildiği Kapı âlâtcılara dâir Ma‘rûz Âsitâne-i aliyye’de vâki‘ çilingir esnâfına mülhak kapı âlâtcı esnâfının kahyası Artin ve yiğitbaşısı Vartan ve ustalarından Artin ve Serkiz ve Ovannes ve Serope ve Haçador ve Sahak ve Kerope ve Serope ve Vartan ve Anparson ve Haçador ve Ovannes ve sâir mazbûtü’l-esâmî zimmîler meclis-i şer‘-i hatîrde yine esnâf-ı merkūmeden Ayvaz ve karındaşı Hamparson veledey-i Beyihan nâm zimmîler muvâcehelerinde mesfûrân Ayvaz ve karındaşı Hamparson zimmîler kendi hâllerinde ırzlarıyla mukayyed ve kâr u kisbleriyle meşgūller olmayıp dâimâ nizâm-ı kadîmimizin mugāyiri nice harekât-ı nâ-bercâya ictisâr ve esnâfımız beyninde türlü türlü fesâdı mûcib hâlât-ı rediyeye ibtidâr ve şirâze nizâmımızın ihtilâline bâdî oldukları âşikâr olmağla zimmîyân-ı mesfûrânın bu makūle ihtilâl-i nizâm-ı kadîmi mûcib harekât-ı nâ-marzıyelerinden cümlemizin emn ü rahatımız meslûb olmağla kendilerden bir vechile hoşnûd ve râzı değilleriz deyü mersûmânın sû’-i hâllerinden bahisle bi’l-ittifâk muvâcehelerinde teşekkî ve sû’-i hâlini ihbâr ve fîmâ-ba‘d esnâf-ı mezkûreye duhûl etmeyip kesb-i âhara şürû‘ etmek üzere mersûmânın esnâf-ı merkūmeden tard ü teb‘îd ve ihrâc olunmalarını bi-ecma‘ihim iltimâs ve istirhâm eyledikleri İstanbul [Mahkemesi’nden] huzûr. Fî 19 B sene [1]223.