İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 525 Hüküm no: 516 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahıskalı Serkiz’in Kayserili Malkasoğlu Terzi Kigork’dan üç bin kuruş alacağı olduğu 3.000 guruş hüküm Ma‘rûz Sâhib-i arzuhâl Ahıskalı Serkiz v. Arakil nâm zimmî Çarşamba günü arz odasında huzûr-ı hazret-i sadâret-penâhîde ma‘kūd meclis-i şer‘-i hatîrde Kayseriyeli Malkasoğlu Derzi Kigork nâm zimmî muvâcehesinde bin iki yüz on yedi senesi Cumâdelâhire’sinin on beşinci günü mesfûr Kigork ile dâmâdı Dülbendci Artin zimmîler herbiri âharın zimmetine lâzım gelen meblağa kefîl ve zâmin olarak malımdan ve yedimden iktirâz ve kabz eyledikleri üç bin üç yüz yirmi beş guruş zimmetlerinde hakkım olup hattâ meblağ-ı merkūm vech-i meşrûh üzere zimmetlerinde bana deynleri olduğunu ikrâr ve deyn-i mezkûrlarını nâtık işbu bir kıt‘a temessükü yedime i‘tâ etdiklerinden sonra mesfûr Artin zimmî diyâr-ı âhara firâr etmekle meblağ-ı mezbûr üç bin üç yüz yirmi beş guruşu asâlet ve kefâletine binâen mersûm Kigork zimmîden hâlâ taleb ederim deyü da‘vâ etdikde ol dahi cevâbında târih-i merkūmda dâmâdım mesfûr ile ma‘an herbirimiz âharın zimmetine lâzım gelen meblağa kefîl ve zâmin olarak müdde‘î-i mersûm Serkiz zimmîden ancak üç bin guruş iktirâz ve kabz etmişidik deyü ol-mikdârını ikrâr ziyâdeyi inkârından mâ‘adâ bir sene mürûrunda ben meblağ-ı mezbûra mahsûben dâmâdım gāib-i mesfûra ol-mikdâr guruşluk eşyâ-i ma‘lûme teslîm etmiş idim lâkin dâmâdım mersûm eşyâ-i merkūmeyi kabz edip eğerçi dâyinimiz müdde‘î-i mersûma vermeyip mücerred eşyâ-i mezkûreyi dâmâdım mesfûra teslîm eylediğime binâen dâyinimiz müdde‘î-i mersûm Serkiz zimmî meblağ-ı mezbûru dâmâdım gāib-i mersûmdan mütâlebe eylesin dediği kelâmı def‘a sâlih cevâb-ı şer‘î olmadığı kendiye tefhîm ve müdde‘î-i mesfûr Serkiz ber-vech-i muharrer ziyâde üç yüz yirmi beş guruş müdde‘âsına ikāmet-i beyyine edemeyip tahlîfe dahi tâlib olmamağla mikdâr-ı mezkûrda mutâlebesiyle bilâ-beyyine mu‘ârazadan ba‘de’l-men‘ sâlifü’l-beyân mersûm Kigork zimmînin ikrârı mûcebince lâzım gelen meblağ-ı merkūm üç bin guruşu asâlet ve kefâletine binâen müdde‘î-i mesfûr Serkiz zimmîye edâsıyla mersûm Kigork zimmî ilzâm olunduğu İstanbul Mahkemesi’nden huzûr. Fî 23 B sene [1]223.