İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 524 Hüküm no: 515 Orijinal metin no: [75a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Ayşe’nin mirasıyla alakalı olarak vârisi Abdulkadir ile merhumenin malının üçte birine vasi tayin olunan Kağıtçı Hasan Efendi’nin sulh oldukları Hâric ez-defter mîrâsdan sulh Ma‘rûz Mahrûse-i Galata’ya muzâfe Salıpazarı nâm mahâlde Süheylbey mahallesinde sâkine iken bundan akdem vefât eden Âişe bt. Hüseyin nâm hatunun li-ebeveyn kız karındaşı oğlu ve zî-rahm cihetinden hasren vârisi olduğu mütehakkık olan sâhib-i arzuhâl Abdulkadir b. Ahmed nâm kimesne meclis-i şer‘-i münîrde müteveffât-ı mezbûrenin sülüs-i malını vesâyâ-yı mu‘ayyene ve gayr-ı mu‘ayyenesine tenfîze bâ-hüccet vasî-i muhtârı derûn-ı arzuhâlde mezkûrü’l-ism Kâğıdcı Hafız Hasan Efendi mahzarında mûrisem teyzem müteveffât-ı mezbûrenin hîn-i vefâtında ben diyâr-ı âharda bulunduğum hasebiyle [75b] ma‘rifet-i şer‘le tahrîr ve füruht olunan terekesinden sülüs vasiyeti ihrâc olundukdan sonra sahhu’l-bâkī ber-mûceb-i defter-i kassâm hisse-i irsiyemi ahz ü istifâ eylediğimden mâ‘adâ hâric ez-defter-i kassâm yine müteveffât-ı mezbûrenin terekesinden olmak üzere mecmû‘u üç bin iki yüz kırk guruş kıymetli bir akarsu resmi elmas çiçek ve bir gaddâre resmi elmas çiçek ve ortası elmaslıca bir çift altın kuşak ve üç elmas yüzük ve bir altın saat ve kırk top elvân gezi ve kumaş ve bir şal entari ve bir şeritli sevâyî entari ve bir sincab kürk ve on elvân entari ve iki yüz çevre ve yüz değirmi yemeni ve beş hamam takımı ve beş canfes şalvar ve incilice bir duhân kîsesi ve bir leğen ma‘a ibrik ile nakid üç bin guruş beyaz akçe ve on bin guruşluk mahlût altınını vasî-i mezbûr Hafız Hasan Efendi müstakıllen bi-gayrı hakkın ahz ü ketm ve ihfâ etmekle eşyâ-i muharrere-i mezkûre ile nukūd-ı merkūmeden hisse-i irsiye-i şer‘iyemi askerî kassâmı mevâlî-i fihâmdan fazîletlü Lütfullah Efendi huzûrunda bundan akdem vasî-i mezbûrdan taleb ve da‘vâ eylediğimde ol dahi müdde‘âmı külliyen inkâr ve ben ol târihde ber-minvâl-i muharrer müdde‘âma ikāmet-i beyyine edemediğim ecilden talebimle merkūm Hafız Hasan Efendi’ye yemîn verilip bilâ-beyyine mu‘ârazadan men‘ olunmuş idim lâkin el-hâletü hâzihî müdde‘âmı isbât için şâhidlerime zafer bulmamla ba‘de’l-istima‘ eşyâ-i mezkûre ile nukūd-ı merkūmeden hisse-i irsiyemi taleb ederim deyü eylediğim da‘vâ-yı mezkûremi isre’l-istimhâl ve’l-imhâl müddet-i mehl-i şer‘î mürûr edip bir vechile ikāmet-i beyyine edemeyip ancak kat‘a li’n-nizâ‘ vasî-i mezbûr Hafız Hasan Efendi malından rızâsıyla teberru‘an bana yetmiş guruş def‘ ü teslîm ben dahi kabz ve istihlâk edip mûrisem teyzem müteveffât-ı mezbûrenin bi’l-cümle terekesine ve hukūk-ı mîrâsa müte‘allika âmme-i de‘âvî ve kâffe-i mutâlebâtdan merkūm Hafız Hasan Efendi’nin zimmetini şurût-ı müfside ve uhûd-ı mubtıladan ârî ve cebr ü kerhden hâlî ibrâ-i âmm-ı sahîh-i şer‘î ile ibrâ ve iskāt eylediğimde ol dahi bana medfû‘u olan meblağ-ı müstehlek-i merkūmun istirdâdına müte‘allika da‘vâdan kezâlik benim zimmetimi ibrâ ve iskāt ve herbirimiz ber-minvâl-i meşrûh âharın ibrâsını kabûlle külliyen kat‘-ı münâza‘a ve hasm-ı husûmet eyledik deyü ikrâr ve tasdîkleri İstanbul Mahkemesi’nde tescîl ve huzûr. Fî 27 [Re]ceb sene [1]223. Şühûdü’l-hâl: Çavuş İshak Ağa, Kethudâ Halil Ağa, Çubukcu Ali Ağa, Tâhir Odabaşı, Çubukcu Mustafa b. Mehmed.