İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 527 Hüküm no: 518 Orijinal metin no: [75b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülbendci Hüsameddin, Hekimbaşı Sinan Efendi ve Hürrem Çavuş camileri vakıflarının tevliyetinin Âmine Hatun’a tevcihi Tevliyet mâddesi Ma‘rûz Nezâret-i dâ‘îlerinde olan evkāfdan İstanbul’da Kumkapı kurbünde vâki‘ Dülbendci Hüsameddin Câmi‘-i şerîfi ve ona mülhak merhûm Hekimbaşı Sinan Efendi vakıflarının tevliyeti ile Keçeciler Hamamı kurbünde Hürrem Çavuş Câmi‘-i şerîfi Vakfı’nın tevliyetine mukaddemâ mutasarrıf olan yazıcı ikinci halîfesi Derviş Ahmed Efendi fevt olmağla mahlûlünden zikr olunan tevliyetler vazîfe-i mu‘ayyeneleriyle sulbiye sagīre kızı sâhibe-i arzuhâl Şerife Âmine’ye tevcîh olundukdan sonra mahalleteyn-i mezkûreteyn ahâlileri ve evkāf-ı mezkûre mürtezikaları zikr olunan tevliyetler muhtâr-ı ahâli-i mahalleye meşrûta ve amel-i kadîm dahi vech-i meşrûh üzere cârî olagelmişdir deyü mukaddemâ inhâ ve iltimâslarıyla sagīre-i mezbûre Şerife Âmine’nin ref‘inden mârrü’z-zikr Hürrem Çavuş Vakfı tevliyeti Selîmiye Câmi‘-i şerîfi hatîbi es-Seyyid Mustafa Efendi’ye ve Dülbendci Hüsameddin ve Hekimbaşı Sinan Efendi evkāfı tevliyetleri Hacı İsmail nâm kimesneye tevcîh olunmuş olduğu hâmiş-i arzuhâlde mastûr derkenârlardan müstebân olup ve sagīre-i mezbûre lisânından takdîm olunan işbu arzuhâli mefhûmunda evkāf-ı mezkûre tevliyetleri babası müteveffâ-yı merkūmun mahlûlünden kendiye tevcîh olunmuş iken ref‘inden mezbûrâna tevcîh olunduğuna mebnî mağdûriyetinden bahisle mutasarrıfları mezbûrânın ref‘lerinden kendiye tevcîh ve ihsân buyurulmak bâbında istid‘â ve mahalleteyn-i merkūmeteyn ahâlileri dahi evkāf-ı mezkûre tevliyetleri muhtâr-ı ahâli-i mahalleye meşrûta olmağla amel-i kadîm üzere sagīre-i mezbûrenin ref‘inden muhtâr-ı cemâ‘at olan mezbûrâna tevcîh olunmağla cümlemiz mütevellîyân-ı mezbûrândan her vechile râzılarız dediklerini ifâde zımnında verilen işbu i‘lâm bâlâsına tevliyet-i mezkûrelerin muhtâr-ı ahâliye [76a] şartı kaydı aklâm-ı pâdişâhîde bulunmadığından gayrı vakfiyesi kaydı dahi olmamağla ahâli-i mahallenin iddi‘âları nâ-be-câ ve hilâf-ı rızâ ve ahâlinin hod be-hod bilâ-vakfiye bu makūle da‘vâya cesâretleri vazîfelerinden hâric idiği hüveydâ olmağla tarafeyni ber-nehc-i şer‘î bi’t-terâfu‘ bir gûne sened ibrâz edebilirler ise senedlerine dahi nazar-birle ber-mûceb-i kuyûd ve iktizâsı tekrar i‘lâma mübâderet eyleyesiz deyü bu dâ‘îlerine hitâben şeref-yâfte-i sudûr olan fermân-ı âlîlerine imtisâlen tarafeyni ihzâr ve terâfu‘-ı şer‘ olunup da‘vâlarını musaddık vakfiye ve bir gûne sened ibrâz edemedikleri ma‘lûm-ı devletleri buyuruldukda tevliyet-i mezkûreler mutasarrıfları merkūmânın ref‘lerinden sâhibe-i ûlâ-i mezbûre Şerife Âmine’ye tevcîhi re’y-i rezîn-i âsafânelerine menût idiği İstanbul Mahkemesi’nden huzûr. Fî 2 Ş sene [1]223.