İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 528 Hüküm no: 519 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Alemdar’ın sulh bedelinden Yağ Kapanı tüccarından olan Mehmed’den beş yüz yetmiş iki kuruş alacağı olduğu 572 guruş hüküm Ma‘rûz Sâhib-i arzuhâl el-Hâc Mustafa Alemdâr b. Mustafa meclis-i şer‘-i münîrde Galata Yağ Kapanı tüccârından derûn-ı arzuhâlde mezkûrü’l-ism es-Seyyid Mehmed b. es-Seyyid İsmail muvâcehesinde târih-i i‘lâmdan bir sene mukaddem mahrûse-i İsmail İskelesi’nden İstanbul’a nakl ve Eminönü nâm mahâlde Mehmed Yazıcı nâm kimesneye li-ecli’l-hıfz teslîm etmek üzere Akkirmanlı Ömer Reis sefînesine ücret-i ma‘lûme kavliyle tahmîl eylediğim malımdan mecmû‘u bin seksen dört guruş kıymetli seksen iki aded sığır ve beş aded öküz cem‘an seksen yedi aded gönlerimi reis-i merkūm İstanbul’a nakletdikde mezbûr Mehmed Yazıcı Âsitâne’den bulunmamak hasebiyle reis-i mezbûrun emîni olan işbu hâzır bi’l-meclis Derzi Mustafa Beşe vesâtetiyle mezbûr es-Seyyid Mehmed’in mahzenine vaz‘ olunmağla merkūm es-Seyyid Mehmed dahi zikr olunan ol-mikdâr gönleri âhara bey ve teslîmle istihlâk edip ben bu esnâda Âsitâne-i aliyye’ye gelip suâl ve tefahhus eylediğimde mezbûr es-Seyyid Mehmed mârrü’z-zikr ol-mikdâr gönleri cem‘an yedi yüz guruş bir rub‘a âhara bey‘ ve teslîmle istihlâk edip semen-i mezkûrdan yetmiş sekiz guruşunu gümrük ve hammaliye mesâriflarına sarf eyledim mâ‘adâ altı yüz yirmi iki guruş on parası yed ve hıfzımdadır deyip yüz elli guruşunu bana def‘ ü teslîm ben dahi ahz ü kabz etmiş idim lâkin ben mezbûrun ber-vech-i muharrer bey‘ini mücîz olmadığım ecilden bâlâda mezkûr kıymetleri olan bin seksen dört guruşdan ber-minvâl-i meşrûh gümrük ve hammaliye mesâriflarıyla bana medfû‘u olan meblağ-ı merkūm yüz elli guruş fürû-nihâde olunarak bâkīsi olan sekiz yüz elli altı guruşu mezbûr es-Seyyid Mehmed’den bi-tarîki’z-damân hâlâ taleb ederim deyü da‘vâ etdikde ol dahi cevâbında müdde‘î-i mezbûrun mâlı olmak üzere sâlifü’z-zikr makbûzum olan ol-mikdâr gönleri cem‘an kıymetleri olan yedi yüz guruş on paraya âhara bey‘ ü teslîmle istihlâk etmiş idim deyip ziyâde kıymet müdde‘âsını inkârından mâ‘adâ müdde‘î-i merkūm el-Hâc Mustafa Alemdâr bundan akdemce da‘vâ-yı mezkûresinden bâ-vesâtet-i muslihîn benimle bi’t-tav‘ ve’r-rızâ sekiz yüz guruşa ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâya müte‘allika âmme-i da‘vâdan benim zimmetimi ibrâ ve iskāt ben dahi ibrâsını kabûl edip bedel-i sulh olan meblağ-ı merkūmdan bâlâda mezkûr gümrük ve hammaliye mesârifları yetmiş sekiz guruş ve gümrük kabzını mu‘terif olduğu meblağ-ı merkūm yüz elli guruş ki cem‘an iki yüz yirmi iki guruş fürû-nihâde ve tenzîl olundukda sahhu’l-bâkī beş yüz yetmiş iki guruş zimmetimde deynim kalmışdır deyü eylediği def‘ini müdde‘î-i merkūm el-Hâc Mustafa Alemdâr bi-tamamihi ikrâr ve tasdîk edip lâkin ben sulh-ı mezkûra nâdim olmamla ziyâde kıymetini taleb ederim deyü takrîri üzere sulhu mu‘terif iken tasaddî eylediği da‘vâsı şer‘an mesmû‘a olmadığı kendiye tefhîm ve ziyâde kıymet mutâlebesiyle bî-vech mu‘ârazadan ba‘de’l-men‘ mezbûr es-Seyyid Mehmed’in sâlifü’l-beyân ikrâr ü i‘tirâfıyla lâzım gelen meblağ-ı bâkī-i merkūm beş yüz yetmiş iki guruşu müdde‘î-i mezbûr el-Hâc Mustafa Alemdâr’a edâsıyla merkūm es-Seyyid Mehmed ilzâm olunduğu İstanbul Mahkemesi’nden huzûr. Fî 2 Ş sene [1]223.