İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 539 Hüküm no: 530 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mustafa’nın Cebeali Kapısı dahilindeki bir adet çörekçi fırını gediğini bir yıllığına üç yüz yirmi dört kuruşa Andriya v. Velko’ya kiraya verdiği Çörekci fırını îcârı Ma‘rûz Sâhibe-i arzuhâl mu‘arrefetü’z-zât Şerife Âişe bt. Mustafa nâm hatun meclis-i şer‘-i münîrde simitci tâifesinden Andriya v. Velko nâm zimmî muvâcehesinde İstanbul’da Cebeali Kapısı dâhilinde Gül Câmi‘-i şerîfi civârında kâin bir bâb çörekçi fırını derûnunda mevcûde beyne’l-esnâf gedik ta‘bîr olunur müstakılleten mâlike olduğum âlât-ı lâzıme-i ma‘lûmemi işbu bin iki yüz yirmi üç senesinde duhûl eden rûz-ı Hızır’dan sene-i âtîye rûz-ı Hızır’ına değin bir sene-i kâmile zabt ve isti‘mâl etmek üzere mersûm Andriya zimmîye üç yüz yirmi dört guruşa îcâr ve teslîm ol dahi ber-vech-i muharrer ba‘de’l-istîcâr ve’t-tesellüm es-Seyyid Mehmed Usta nâm kimesneye îcâr ve teslîm edip icâre-i mezkûreyi mesfûr Andriya zimmîden zevcim işbu hâzır bi’l-meclis Mehmed Ağa yediyle tamamen kabz olunup ol-vechile fırın-ı mezkûr gediği sene-i âtîye rûz-ı Hızır’ına dek zimmî-i mesfûrun taht-ı icâresinde olmağla kable tamami’l-müdde fırın-ı mezkûra müte‘allika zimmî-i mersûm ile kat‘a da‘vâ ve nizâ‘ım yokdur dediğini mesfûr Andriya zimmî tasdîk eylediği İstanbul Mahkemesi’nden huzûr. Fî 19 Receb sene [1]223.