İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 538 Hüküm no: 529 Orijinal metin no: [77b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İşkenbe çorbacısı esnafının kendilerine mahsus olan işkenbe ve şirden çorbalarını pişirip satarak nizamlarına aykırı hareket eden aşçı, çevrenci, kebapçı ve hoşabcı esnafı aleyhine açtıkları men davasında ferman talep ettikleri İşkenbenci mâddesi Ma‘rûz Dergâh-ı âlî -dâme mahfûfen bi’l-me‘âlî- Yeniçerileri Ağası izzetlü Mustafa Ağa kullarının işbu arzı bâlâsına sâdır olan fermân-ı âlîlerine imtisâlen Âsitâne-i aliyye ve Bilâd-ı selâse’de vâki‘ işkenbe şorbası tabh ve bey‘le melûf olan esnâfın kethudâsı Mehmed Usta ve yiğitbaşı Bayram Usta ve müsinn ü ihtiyâr ustalarından İbrahim ve Ömer ve Ali ve Hasan ve diğer Hasan ile re‘âyâdan Yorgi ve Rizo ve sâir bi’l-cümle Müslim ve zimmî ustalar Çarşamba günü arz odasında huzûr-ı hazret-i sadâret-penâhîde ma‘kūd meclis-i şer‘-i münîrde Âsitâne-i aliyye ve Bilâd-ı selâse’de vâki‘ aşçı ve çevrenci ve kebâbcı ve hoşâbcı esnâfının kethudâsı es-Seyyid el-Hâc Hasan ve yiğitbaşıları Ali Usta ve mütevellîleri el-Hâc Mehmed Emin ve yazıcıları Mehmed Emin ve müsinn ü ihtiyâr Müslim ustalarından el-Hâc Mustafa ve Mercanlı Mehmed ile re‘âyâdan Niko ve Mihal ve Nedelko ve Tanaş ve Dimo ve Yani ve Angeli ve Yorgi ve Nikola ve sâir Müslim ve zimmîler muvâcehelerinde işbu yedimizde olup meclis-i şer‘de mu‘âyene ve kırâet olunan emr-i şerîf-i âlî-şân ve sicill-i mahfûzdan muhrec bir kıt‘a i‘lâmda zikr ü beyân ve tasrîh ü ayân kılındığı üzere Dergâh-ı âlî yeniçerileri ocağına merbût mîrî zağarlara [78a] ve seksonlara ve bostaniyân-ı hâssa ocağında olan mîrî seksonlara kifâyet mikdârı işkenbe verip ve bu mukābelede İstanbul ve Eyüb ve Galata ve Tophâne ve bunlara müte‘allik kasabât ve kurâda tabh olunan sirkelü ve sarımsaklı işkenbe ve şirden şorbası tabh ve bey‘i mâ-tekaddemden beri bizlere mahsûs iken aşçı tâifesi merkūmûn hilâf-ı fermân-ı âlî ve mugāyir-i şurût-ı nizâm harekete ictisâr ile bizim metâ‘-ı mahsûsamız olan işkenbe ve şirden şorbası tabh ve bey‘ine tasaddî etmeleriyle husûs-ı mezkûr için beynimizde bi’d-defa‘ât münâza‘adan sonra yine kadîmi üzere bizlere tahsîs kılınmış iken esnâf-ı mezbûrûn bin iki yüz yirmi iki senesinde gerek işkenbeci esnâfı ve gerek aşçı ve çevrenci ve kebâbcı ve hoşâbcı esnâfı sirkelü ve sarımsaklı işkenbe ve şirden şorbası tabh ve bey‘ eylemeleri’çün ruhsatı hâvî bir takrîb emr-i âlî ısdâr etdirip lâkin bizler mîrî zağarlara ve seksonlara işkenbe verip ve bu mukābelede mârrü’z-zikr işkenbe ve şirden şorbasını kadîmi üzere bizler tabh ve bey‘ edip esnâf-ı merkūmûn tabh ve i‘mâl etmemek üzere mezbûrûna tenbîh olunmak matlûbumuzdur deyü takrîrlerine mutâbık ibrâz eyledikleri fermân-ı âlî-şân ile i‘lâm-ı mezkûrun mazmûnlarını esnâf-ı merkūmûn tasdîk etmeleriyle bu sûretde aşçı ve çevrenci ve kebâbcı ve hoşâbcı esnâfının yedlerinde olan emr-i âlî-şân-ı mezkûrun kaydı ref‘ ü terkīn ve kadîmi üzere sirkeli ve sarımsaklı işkenbe ve şirden şorbasını müdde‘ûn-ı merkūmûn tabh ü i‘mâl ve bey‘ etmeleri bâbında bu dâ‘îleriyle izzetlü yeniçeri ağası kullarına hitâben bâlâsı tuğrâ-yı garrâ-yı cihandârî ile müveşşah bir kıt‘a fermân-ı âlî-şân sudûrunu istid‘â ve istirhâm eyledikleri İstanbul Mahkemesi’nden huzûr. Fî 29 [Re]ceb sene [1]223.