İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 540 Hüküm no: 532 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Madenci Ustası Kireki oğlu Dimitri’nin Madenci Ustabaşı Sava’dan beş bin beş yüz guruş alacağı olduğu 5.500 guruş hüküm Ma‘rûz Anadolu’da Balıkesir Kazâsı civârında İne Ma‘deni’nde ma‘denci ustalarından Kireki oğlu Dimitri nâm zimmî Çarşamba günü arz odasında huzûr-ı hazret-i sadâret-penâhîde ma‘kūd meclis-i şer‘-i münîrde tüccârdan Basmacıoğlu Yorgi v. Menayil zimmî hâzır olduğu hâlde ma‘den-i mezkûrda sâbıkā ustabaşı olan Sava v. Aleksi nâm zimmî muvâcehesinde târih-i i‘lâmdan on beş ay mukaddem ben malımdan hâzır-ı mersûm Basmacıoğlu Yorgi zimmîye mudârebe tarîkıyla verdiğim beş bin guruş mesfûrun yedinde iken ticaret tarîkıyla kazâ-i merkūma vardıkda işbu mesfûr Ma‘denci Ustası Sava zimmî benim ma‘denci ustalarından Kireki v. Kostantin zimmetinde külliyetli alacağım vardır ve oğlu Dimitri’nin sana mudârebe tarîkıyla verdiği meblağ-ı merkūm beş bin beş yüz guruş babası mesfûr Kireki zimmînin malı olmağla mersûm Kireki zimmî meblağ-ı merkūm ile beni gıyâbınızda üzerinize havâle eyledi diyerek sâhib-i arzuhâl işbu hâzır bi’l-meclis Kayseriyeli Arayıcı Anaştaş zimmî ma‘rifetiyle hâzır-ı mesfûr Basmacıoğlu Yorgi zimmîyi bilâ-mürâfa‘a kazâ-i merkūm voyvodasına bir takrîb habsetdirip meblağ-ı merkūm beş bin beş yüz guruşu bi-gayrı hakkın yedinden ahz etmekle mehûzu olan meblağ-ı mezbûru mesfûr Sava zimmîden istirdâd murâdımızdır deyü hâzır-ı mersûm Yorgi zimmî tasdîkiyle ma‘an da‘vâ etdiklerinde mersûm Sava zimmî cevâbında meblağ-ı merkūm beş bin beş yüz guruşu vech-i meşrûh üzere ahz ü kabz etmiş idim deyü tâyi‘an ve kat‘iyyen ikrâr ü i‘tirâf edip lâkin benim mersûm Dimitri’nin babası mesfûr Kireki zimmîde bâ-mürâsele mahkûmun-bih cevher ta‘bîr olunur dokuz yüz seksen dört koğa ma‘den toprağı alacağım olup kā‘ide-i ma‘denciyân üzere beher koğası yirmişer guruşdan cem‘an on dokuz bin altı yüz seksen guruşa bâliğ olmağla meblağ-ı mezbûrun yedi bin beş yüz guruşunu gāib-i mersûm Kireki zimmîden mahâllinde kabz eyledim ve işbu oğlu müdde‘î-i mersûm Dimitri’nin hâzır-ı mesfûr Yorgi zimmîye mudârebe tarîkıyla verdiği meblağ-ı merkūm beş bin beş yüz guruş dahi babası mersûm Kireki zimmînin malı olmağla binâen-aleyh zikri mürûr eden alacağıma mahsûben ahz etmiş idim deyü îrâd eylediği kelâmı def‘a sâlih cevâb-ı şer‘î olmamağla iltifat olunmayıp ikrârı mûcebince bi-gayrı hakkın makbûzu olan meblağ-ı merkūm beş bin beş yüz guruşu mesfûr Sava zimmîden şer‘an tahsîl ve mersûm Yorgi zimmî huzûrunda müdde‘î-i mesfûr Dimitri zimmîye redd ü teslîm olunmak iktizâ eylediği İstanbul Mahkemesi’nden huzûr. Fî-gurreti Ş sene [1]223.