İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 541 Hüküm no: 533 Orijinal metin no: [78a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celep İbiş’in Kartal kazasında çalındığını iddia ettiği paraları tazmin etmeleri için kaza ahalisi aleyhine açtığı davasının meşru olmadığı 3.000 guruşa akçe ve 2.000 guruşluk eşyâ men‘i Ma‘rûz Celeb tâifesinden Şeyh Bozanlı Aşîreti’nden hâmiş-i arzuhâlde derkenârda ismi mezkûr İbiş b. İbrahim nâm kimesne meclis-i şer‘-i münîrde medîne-i Üsküdar’da tâbi‘ Kartal Kazâsı ahâlisinden ashâb-ı arzuhâl Câmi‘-i sagīr imâmı es-Seyyid Hafız Ömer Efendi b. es-Seyyid Ahmed ve Câmi‘-i kebîr imâmı es-Seyyid Hafız Osman Efendi b. es-Seyyid el-Hâc Mehmed ile kazâ-i mezbûr ihtiyârlarından el-Hâc Eyüb b. el-Hâc İbrahim ve el-Hâc İsmail b. el-Hâc Mustafa ve Hüseyin b. Mehmed ve Şehir Kethudâsı Feyzullah b. Hasan ve el-Hâc Mustafa b. Fazlullah nâm kimesneler ile re‘âyâdan Yani v. Kostantin ve Lazari v. Foti ve Kirkor v. Agop nâm zimmîler muvâcehelerinde ben celeb tâifesinden olup bu def‘a Âsitâne-i aliyye’ye sevk ve tesyîr eylediğim ma‘lûmü’l-aded ağnâmımı füruht edip târih-i i‘lâmdan dokuz gün mukaddem Âsitâne-i aliyye’den vatan-ı aslîmize gider iken esnâ-i tarîkde kazâ-i merkūma gece ile duhûl ve Sultan Mustafa Câmi‘-i şerîfi kurbünde tarîk-i cadde üzerinde refîklerim ile li-ecli’l-istirâha bir mikdâr meksimiz esnâsında benim iki bârgirlerim mahâll-i mezkûrdan firâr edip birini harman yeri nâm mahâlde ve birini câmi‘-i mezbûr havlusunda bulup lâkin zikr olunan bârgire tahmîl eylediğim derûnunda nakid üç bin guruş akçem ve iki bin guruş kıymetli eşyâ-i ma‘lûmem mevzû‘ heybem [78b] serika olunup zâyi‘ olmağla kazâ-i mezbûr zâbiti ve sâir iş erleriyle bi’l-ma‘iye tefahhus olundukda bir vechile zâhire ihrâc olunmayıp hâib ve hâsir kalmamla sâlifü’z-zikr ol-mikdâr akçem ve eşyâm mücerred kazâ-i mezbûrda zâyi‘ olduğuna binâen ahâlisi merkūmûn mallarından bana zâmin olsunlar deyip ve ahâli-i mezbûrûn husûs-ı mezkûrda kat‘a haber ve âgâhımız yokdur deyü külliyen inkârlarından mâ‘adâ müdde‘î-i mezbûrun takrîr-i meşrûhu üzere tasaddî eylediği da‘vâsı şer‘an mesmû‘a olmamağla mu‘ârazadan bî-vech [men‘] olunduğu İstanbul Mahkemesi’nden huzûr. Fî-gurreti Ş sene [1]223.