İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 544 Hüküm no: 537 Orijinal metin no: [78b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Artin’in Avgasib v. Anbarsun’dan sekiz yüz kuruşa satın aldığı terzi gediğinin muteber olmadığı anlaşıldığından ödediği parasının kendisine iadesi 800 guruş hüküm Ma‘rûz Sâhib-i arzuhâl Derzi Artin v. Abraham nâm zimmî meclis-i şer‘-i münîrde Avgasib v. Anparson nâm zimmî muvâcehesinde İstanbul’da Bezzâzistân-ı atik kurbünde Perdahtcılar Hanı civârında Parçacılar sûkunda kâin bir bâb derzi dükkânında mesfûr Avgasib zimmînin babası Derzi Anparson zimmî sağlığında müşâhereten müstecir ve ol-vechile mütemekkin iken bundan akdem hâlik oldukda oğlu mersûm Avgasib zimmî mûrisim babam mesfûr sağlığında dükkân-ı mezkûra rağbet verip gedik etmekle dükkân-ı mezkûr gediği irsen mülkümdür mu‘teber derzi gediğidir deyü malımdan ve yedimdem kabz eylediği sekiz yüz guruşa bana bey‘ ben dahi iştirâ etmiş idim lâkin dükkân-ı mezkûrun bi’l-icâreteyn mutasarrıfları işbu hâzırân bi’l-meclis Fatma bt. İsmail nâm hatun ile Sarrâf Luka v. Yani zimmî dükkân-ı merkūm bilâ-gedik zabt ü tasarruf olunageldiğini nâtık bir kıt‘a i‘lâm-ı şer‘î ibrâz eylediklerinden mâ‘adâ dükkân-ı mezkûr gediği Başmuhâsebe’de ve aklâm-ı sâirede mukayyed olmayıp mu‘teber gediklerden olmadığına mebnî beni ihrâc [79a] etmeleriyle ben dahi ber-vech-i muharrer gedik-bahâ nâmıyla malımdan makbûzu olan meblağ-ı mezbûr sekiz yüz guruşu mesfûr Avgasib zimmîden istirdâd murâdımdır deyü hâzırân-ı merkūmânın tasdîkleriyle da‘vâ etdikde ol dahi cevâbında kaziyye minvâl-i meşrûh üzere olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin alâ-mûcibi i‘tirâfihî makbûzu olan meblağ-ı merkūm sekiz yüz guruşu müdde‘î-i mesfûr Artin zimmîye redd ü teslîme mersûm Avgasib zimmîye tenbîh olunduğu İstanbul Mahkemesi’nden huzûr. Fi 29 Receb sene [1]223.