İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 545 Hüküm no: 539 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniceli Mehmed’in Mimar Çarşısı’ndaki bir adet tütüncü dükkânı gediğini dört yüz yirmi kuruşa İmam Ali Efendi’ye sattığı 420 guruşa tütüncü gediği bey‘i Ma‘rûz Sâhib-i arzuhâl Yeniceli es-Seyyid Mehmed b. Mustafa meclis-i şer‘-i münîrde derûn-ı arzuhâlde mezkûrü’l-ism İmâm Ali Efendi b. Mehmed mahzarında Tütüncüler Kethudâsı İbrahim Ağa b. Ahmed ve Yiğitbaşı es-Seyyid Abdullah ve tütün tüccârından Kurbancızâde Ali Efendi ve Molla Hasan ve sâirleri hâzır oldukları hâlde İstanbul’da Mimâr Çarşısı’nda bakkāl karşısında köşe başında bir bâb tütüncü dükkânı mezbûr Ali Efendi ile zevcesi Saliha bt. Hafız Osman nâm hatunun bi’l-icâreteyn taht-ı tasarruflarında olup şehriye yüz on para kirâ ile ben müstecir ve gediği hâmiş-i arzuhâlde mastûr Ma‘den Kalemi’nden muhrec derkenâr mantûkunca Hafız İsmail Efendi dükkânı deyü mukayyed ve mu‘teber gediklerden olup tedâvül-i eyâdî ile babam Kurdköylü Mustafa b. Ali nâm kimesnenin yedinde mülkü olduğu hâlde dört sene mukaddem dükkân-ı mezkûr gediği ta‘bîr olunan âlât-ı lâzıme-i ma‘lûmeyi bana semen-i ma‘lûm ve makbûzâ bey‘ ü temlik ve teslîm ben dahi iştirâ ve temellük ve tesellüm ve kabûl etmemle ol-vechile gedik-i mezkûr müstakıllen yedimde şirâen mülküm olmağla hâlâ ben sâlifü’z-zikr tütüncü gediği ta‘bîr olunan âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan işbu merkūm İmâm Ali Efendi’ye dört yüz yirmi guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūmun yüz yetmiş guruşunu dükkân-ı mezkûr kirâsından zimmetimde müctemi‘ deynim olan yüz yetmiş guruşa bi’t-terâzî takas ve mahsûb olunup mâ‘adâsı olan iki yüz elli guruşu müşterî-i mezbûr Ali Efendi işbu meclis-i şer‘de bana def‘ ü teslîm ben dahi ahz ü kabz ve ol-vechile istifâ-i hak edip fîmâ-ba‘d dükkân-ı mezkûr gediği mezbûr Ali Efendi’nin mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan herbirimiz âharın zimmetini ibrâ ve iskāt ve herbirimiz âharın ibrâsını kabûl eyledik deyü ikrâr ve tasdîkleri İstanbul Mahkemesi’nden tescîl ve huzûr. Fî 10 Ş sene [1]223. Şühûdü’l-hâl: Yeniceli Molla İbrahim, es-Seyyid el-Hâc İbrahim Ağa, Eyyûbî İbrahim Ağa b. İsmail, es-Seyyid Mustafa Ağa b. Ahmed, Molla Hasan b. ( ), Kurbancızâde Ali Efendi, Yiğitbaşı es-Seyyid Abdullah, Tütüncüler Kethudâsı İbrahim Ağa.