İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 546 Hüküm no: 540 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Hüseyin’in Debbağ Ahmed ve kayınvalidesi Ayşe aleyhine açtığı menzil davasında iki yüz elli kuruşa sulh olduğu 250 guruşa Silivrikapısı’nda menzil nizâ‘ı sulhu Ma‘rûz Sâhibe-i arzuhâl mu‘arrefetü’z-zât Emetullah bt. Hüseyin nâm hatun Haremeynü’ş-şerîfeyn müfettişi müderrisîn-i kirâmdan fazîletlü es-Seyyid Mehmed Zeki Efendi ma‘iyetiyle du‘âhâne-i dâ‘îlerinde akd olunan meclis-i şer‘-i münîrde zikri âtî menzile ale’l-iştirâki’s-seviyy mutasarrıflar olup kendi nefsinden asîl ve kayınvâlidesi Şerife Âişe bt. Ahmed nâm hatun tarafından husûs-ı âtîde vekâleti zâtını ârifân el-Hâc Yahya Efendi b. Abdurrahman ve Osman Ağa b. Ali şehâdetleriyle sâbit olan Debbâğ es-Seyyid Ahmed b. Ahmed muvâcehesinde hâmiş-i arzuhâlde mastûr defter-i vakıfdan muhrec derkenâr nâtık olduğu üzere Haremeyn-i Muhteremeyn Evkāfı müsakkafâtından İstanbul’da Silivrikapısı dâhilinde Arabacı Bâyezid mahallesinde kâin beher şehr on akçe icâre-i müecceleli bir bâb vakıf menzil bâ-temessük-i mütevellî bi’l-icâreteyn taht-ı tasarrufumda iken bin iki yüz on sekiz senesi evâhirinde menzil-i mezkûrun nısfını gāib ani’l-meclis zevcim Ali Ağa b. İsmail’e ve rub‘unu işbu hâzır bi’l-meclis es-Seyyid Mehmed Sadık b. Halil nâm kimesneye ferâğ eder olduğumda zevcim merkūm benimle ölünceye değin geçinmek ve merkūm es-Seyyid Mehmed Sadık dahi beni görüp ve gözetmek şartıyla bâ-re’y-i mütevellî vech-i meşrûh üzere merkūmâna ferâğ ve kasr-ı yed eylediğimden sonra bin iki yüz yirmi senesinde menzil-i merkūmun bâkī kalan rub‘ hissemi dahi kezâlik şart-ı mezkûr ile mezbûr es-Seyyid Mehmed Sadık’a bâ-re’y-i mütevellî ferâğ ve kasr-ı yed etmemle ol-vechile menzil-i merkūm mezbûrân bi’l-münâsafe taht-ı tasarruflarında iken zevcim merkūm Ali Ağa menzil-i mezkûrda nısf hisseyi benim izin ve icâzetim ve haber ve âgâhım yoğiken işbu mezbûr Debbâğ es-Seyyid Ahmed’e ve mezbûr es-Seyyid Mehmed Sadık dahi kezâlik nısf hisse-i mezkûreyi mezbûr es-Seyyid Ahmed’in kayınvâlidesi müvekkile-i mezbûre Şerife Âişe Hatun’a bâ-re’y-i mütevellî eğerçi ferâğ ve kasr-ı yed etmişler olup lâkin ben mezbûrânın ber-vech-i muharrer ferâğlarını mücîze olmadığımdan mâ‘adâ bâlâda mezkûr şartla olan ferâğım sahîh ve mu‘teber olmamağla menzil-i mezkûrdan bâ-re’y-i mütevellî keff-i yedlerine tenbîh olunmak matlûbumdur deyü vakf-ı müşârün-ileyh mütevellîsi hâcegân-ı dîvân-ı hümâyûndan izzetlü Osman Efendi tarafından mürsel vekîli es-Seyyid Mehmed Ağa b. Abdullah hâzır olduğu hâlde da‘vâ eylediğimde onlar dahi cevâbında menzil-i merkūmu sûk-ı sultânîde münâdî yediyle müzâyede olunarak benimle kayınvâlidem müvekkilem mezbûrenin uhdemizde karâr etmekle mutasarrıfları mezbûrân dahi karârı üzere sekiz yüz elli guruş bedel-i makbûza bâ-re’y-i mütevellî fâriğler olup hatta sen dahi ferâğ-ı mezkûrlarını mücîze olmuş idik deyü beni def‘a tasaddî ve ol-vechile beynimizde ba‘de vukū‘i’l-münâza‘a beynimiz tevfîk ve ıslâh olunup müvekkile-i mezbûre ile dâmâdı merkūm es-Seyyid Ahmed kendi mallarından teberru‘an iki yüz elli guruş işbu meclis-i şer‘de bana def‘ ü teslîm ben dahi ahz ü kabz edip menzil-i mezkûra ve bi’l-cümle husûs-ı merkūma ve hukūk-ı sâire-i şer‘iyeye ol dahi teberru‘an bana medfû‘u olan meblağ-ı merkūmun istirdâdına ve hukūk-ı sâire-i şer‘iyeye müte‘allika âmme-i de‘âvî ve kâffe-i mutâlebâtdan herbirimiz bi’l-asâle ve bi’l-vekâle âharın zimmetini şurût-ı müfside ve uhûd-ı mubtıladan ârî ve cebr ü kerhden hâlî ibrâ-i âmm-i sahîh-i şer‘î ile ibrâ ve iskāt ve herbirimiz âharın ibrâsını kabûlle külliyen kat‘-ı münâza‘a ve hasm-ı husûmet eyledik dedikde ol dahi bi’l-asâle ve bi’l-vekâle tasdîk ve mütevellî vekîli hâzır-ı mezbûr dahi menzil-i mezkûru kemâ-fi’s-sâbık bi’l-münâsafe mezbûr es-Seyyid Ahmed ile müvekkilesi kayınvâlidesi merkūme Şerife Âişe Hatun’un zabt ü tasarruflarına re’y eylediğini İstanbul Mahkemesi’nden huzûr. Fî 8 Ş sene [1]223.