İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 570 Hüküm no: 567 Orijinal metin no: [82a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf İsterati ve Nikola’nın kiracıları Bakkal Yovan aleyhine açtıkları alacak davasından vazgeçtikleri Bakkāl ibrâsı Ma‘rûz Sarrâf tâifesinden İsterati v. Frik zimmî asâleten ve Sarrâf Nikola v. Manol nâm zimmînin oğlu ve tarafından husûs-ı âtîde vekâleti Dimitraki ve Yorgi veledey-i Frik zimmîler şehâdetleriyle sâbit olan Merkik zimmî vekâleten meclis-i şer‘-i hatîrde bakkāl tâifesinden Yovan v. İstavri nâm zimmî muvâcehesinde İstanbul’da Fenerkapısı dâhilinde Kolluk ittisâlinde vâki‘ sürücü dükkânı demekle ma‘lûm bir bâb bakkāl dükkânı üç sehm i‘tibârıyla bir sehmi mersûm İsterati zimmî benim ve bir sehmi müvekkil-i mesfûr Nikola zimmînin ve mâ‘adâ bir sehmini dahi Sarrâf Siron v. Yani nâm zimmînin iştirâken bi’l-icâreteyn taht-ı tasarrufumuzda olup ve işbu mesfûr Yovan zimmî dükkân-ı mezkûrda beher şehr on buçuk guruş kirâ ile müstecirimiz ve derûnunda mevcûde beyne’l-hıref gedik ta‘bîr olunan âlât-ı lâzıme mesfûrun mülkü olmağla işbu târih-i i‘lâm şehri gāyetine değin on altı ayda icâre-i mezkûresinden mesfûrun zimmetinde müctemi‘a olup benimle müvekkil-i mersûmun hisselerimize isâbet eden yüz on iki guruşu mesfûr Yovan zimmîden herbirimiz bi’l-asâle ve bi’l-vekâle taleb ve da‘vâ eylediğimizde ol dahi emrinizle dükkân-ı mezkûrun ta‘mîr ve termîmine malımdan harc ü sarf eylediğim üç yüz on guruş yirmi yedi parayı bi’l-mürâca‘a taleb ederim deyü bizden da‘vâya tasaddî ve ol-vechile beynimizde ba‘de’l-münâza‘a bâ-vesâtet-i muslihîn tarafeynden herbirimiz ber-minvâl-i muharrer tasaddî eylediğimiz da‘vâ-yı mezkûrelerimizden meccânen fâriğler olup bi’l-cümle zikr olunan husûslara müte‘allika âmme-i da‘vâdan herbirimiz âharın zimmetini bi’l-asâle ve bi’l-vekâle ibrâ ve iskāt ve herbirimiz ber-vech-i meşrûh âharın ibrâsını kabûl eyledik deyü ikrâr u tasdîkleri İstanbul Mahkemesi’nde tescîl ve huzûr. Fî 16 Şa‘bân sene 1223.