İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 569 Hüküm no: 566 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçevan Panayot’un kiracı olarak oturduğu odayı ay sonuna kadar tahliye edip birikmiş kira ücretiyle birlikte mutasarrıfesi Ümmügülsüm Hanım’a teslim etmesine karar verildiği Oda teslîmi ve 24 guruş hüküm Ma‘rûz Zâtı ta‘rîf-i şer‘î ile mu‘arrefe olan Şerife Ümmügülsüm nâm hatun babası Şişeci Ali Ağa b. Mehmed hâzır olduğu hâlde meclis-i şer‘de bağçevân tâifesinden Panayot v. Aleksandri zimmî muvâcehesinde İstanbul’da Eğrikapı dâhilinde Avcıbey mahallesinde vâki‘ bâ-temessük-i mütevellî bi’l-icâreteyn mutasarrıfe olduğum re‘âyâ mütemekkinler olan bir bâb menzilimin odasında beher şehr dört guruş kirâ mukāvelesiyle mesfûr Panayot zimmî müşâhereten müstecirim olup işbu târih-i i‘lâm şehri gāyetine izâfetle fesh-i akd-i icâre etmemle gāyet-i şehr-i mezbûrda oda-i mezkûru tahliye ve zimmetinde terâküm eden altı aylık yirmi dört guruş kirâmı bana teslîme zimmî-i mesfûra tenbîh olunmak matlûbumdur deyü da‘vâ etdikde ol dahi cevâbında ber-vech-i muharrer ol-mikdâr guruş kirâ vaktinde müdde‘iye-i mezbûreye deyni olduğunu ikrâr lâkin menzil-i mezkûr mukaddemâ benim bi’l-icâreteyn taht-ı tasarrufumda iken mezbûre Şerife Ümmügülsüm Hatun’un zevci olup bundan akdem fevt olan el-Hâc İbrahim Ağa b. Ali nâm kimesneden hayatında karz aldığım dokuz yüz guruş deynim mukābelesinde her ne zaman deyn-i mezkûru edâ edersem redd-i ferâğ olunmak şartıyla bâ-re’y-i mütevellî merkūm el-Hâc İbrahim’e vefâen ferâğ eylediğimden sonra meblağ-ı merkūmu edâ müyesser olmadan merkūm el-Hâc İbrahim fevt ve menzil-i merkūm sulbiye sagīre kızı Şerife Zeliha’ya intikāl etmekle sagīre-i mezbûrenin ceddi ve min-kıbeli’ş-şer‘ vasî-i mansûbu Ali Ağa kıbel-i şer‘den aldığı bir kıt‘a izin hücceti mantûkunca menzil-i mezkûru bedel-i misliyle sagīre-i mezbûrenin vâlidesi mezbûre Şerife Ümmügülsüm Hatun’a bi’l-vesâye bâ-re’y-i mütevellî ferâğ etmiş olup lâkin bâlâda zikr olunduğu üzere menzil-i merkūmu benim mezbûr el-Hâc İbrahim’e ferâğım ferâğ bi’l-vefâ tarîkıyla olmağla meblağ-ı merkūm dokuz yüz guruşu vasî-i merkūm ile mezbûre Şerife Ümmügülsüm Hatun yedimden ahz birle menzil-i mezkûrdan bâ-re’y-i mütevellî keff-i yedine tenbîh olunmak matlûbumdur deyü da‘vâ onlar dahi cevâbında husûs-ı mezkûru külliyen inkârından mâ‘adâ müdde‘î-i mesfûr Panayot zimmî sene-i sâbıkā Ramazan’ının yedinci günü Balat Mahkemesi’nde vasî-i hâzır-ı merkūm Ali Ağa muvâcehesinde sâlifü’z-zikr kabzını mu‘terif olduğu dokuz yüz guruş bedel mukābelesinde menzil-i mezkûru bâ-ma‘rifet-i mütevellî zevcim müteveffâ-yı merkūm el-Hâc İbrahim’e ferâğ-ı kat‘î-i mu‘teber ile ferâğ ve kasr-ı yed eylediğini ve menzil-i merkūmda kat‘a alâka ve medhali kalmadığını bi’t-tav‘ ve’r-rızâ ikrâr u i‘tirâf etmiş idi deyü mazmûnu takrîrine mutâbık bir kıt‘a hüccet-i şer‘iye ibrâzıyla def‘a tasaddî etmekle istikşâf-i hâl için taraf-ı şer‘den mürsel keşif nâibimiz Merhabâzâde Mahmud Efendi menzil-i merkūma varıp ahâli-i mahalleden ve erbâb-ı vukūfdan İmâm es-Seyyid el-Hâc Hafız Mehmed Emin b. es-Seyyid Hüseyin ve İbrahim Efendi b. Hasan ve Abdullah Ağa b. Ahmed ve Ebûbekir b. Musa ve Ali Ağa b. Ebîbekir ve Mustafa b. Ahmed ve Ahmed Beşe b. Mustafa ve Mehmed b. Hüseyin nâm udûl-i Müslimînden istifsâr ve tefahhus ve mu‘âyene etdikde menzil-i merkūmun hîn-i ferâğda ve hâlâ bedel-i misli dokuz yüz guruş olduğu Müslimûn-ı mezbûrûn ihbârlarıyla zâhir ve mütehakkık olduğundan mâ‘adâ merkūme Şerife Ümmügülsüm Hatun’un def‘-i meşrûhunu ve mazmûn-ı hüccet-i merkūmeyi vukūf-ı tamları olan hâzırûn-ı merkūmûnun şehâdetleriyle mesfûr Panayot zimmî muvâcehesinde isbât eylediğini mevlana-yı mezbûr mahâllinde tahrîr ve ma‘an mürsel ümenâ-i şer‘le meclis-i şer‘a gelip tarafeyn muvâcehelerinde alâ-vukū‘ihî inhâ ve takrîr eyledikde zimmî-i mesfûr dahi tasdîk etmeğin ba‘de’t-tenfîz mûcebince mesfûr Panayot zimmî da‘vâ-yı mezkûresiyle bî-vech mu‘ârazadan men‘ olunup oda-i mezkûru gāyet-i şehr-i mezbûrda tahliye ve meblağ-ı merkūm yirmi dört guruş ile ma‘an müdde‘iye-i mezbûreye teslîme mesfûr Panayot zimmîye tenbîh olunduğu İstanbul Mahkemesi’nden huzûr. Fî 13 Şa‘bân sene 1223.