İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 572 Hüküm no: 569 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Karabet’in Kapan taciri Zeytinci Hasan Ağa’da iki bin kuruş alacağı olduğu 2.000 guruş hüküm Ma‘rûz İstanbul’da Kapan-ı dakīk kurbünde mütemekkin sarrâf tâifesinden Karabet v. Agop nâm zimmî meclis-i şer‘-i münîrde Kapan tüccârından Zeytinci el-Hâc Hasan Ağa b. İsmail muvâcehesinde mezbûr el-Hâc Hasan Ağa zimmetinde bâ-temessük cihet-i karzdan altı bin üç yüz elli yedi guruşdan bâkī dört bin guruş mukaddemâ alacağım olup hattâ meblağ-ı bâkī-i merkūm dört bin guruş zimmetinde bana deyni olduğunu nâtık bin iki yüz yirmi bir senesi Cumâdelûlâ gurresi târihiyle müverrah mümzâ ve mahtûm diğer bir kıt‘a temessük dahi i‘tâ etdikden sonra meblağ-ı merkūmun iki bin guruşunu şerîkim Sarrâf Kerope zimmî yediyle bana edâ ve teslîm etmekle ol-vechile sahhu’l-bâkī zimmetinde olan iki bin guruşu merkūm el-Hâc Hasan Ağa’dan hâlâ taleb ederim deyü da‘vâ etdikde ol dahi cevâbında kaziyye minvâl-i meşrûh üzere olup meblağ-ı bâkī-i merkūm iki bin guruş zimmetinde el-yevm müdde‘î-i mersûma sahîhan deyni olduğunu bi-tamamihi tâyi‘an ve kat‘iyyen ikrâr ü i‘tirâf etmeğin alâ-mûcibi i‘tirâfihî meblağ-ı bâkī-i merkūm iki bin guruşu müdde‘î sarrâf-ı mesfûra edâsıyla mezbûr el-Hâc Hasan ilzâm olunduğu İstanbul Mahkemesi’nden huzûr. Fî 15 Ş sene [1]223.