İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 572 Hüküm no: 570 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu Mustafa Ağa’nın yapılacak ticarete sermaye ve karz olarak verdiği paralardan Şileli Reis Ali Ağa’dan altı bin yüz seksen yedi kuruş alacağı olduğu 6.187 guruş hüküm Ma‘rûz Sâhib-i arzuhâl Sabuncu Mustafa Ağa b. Mustafa nâm kimesne meclis-i şer‘-i münîrde derûn-ı arzuhâlde mezkûrü’l-ism sefîne reislerinden Şileli Ali Ağa b. el-Hâc Ahmed nâm kimesne muvâcehesinde Kapan tüccârı beyninde üçledim ta‘bîr olunur fâide-i hâsılasının üç sehm i‘tibârıyla bir sehmi benim ve bir sehmi sâhib-i sefîne olan merkūm Ali Ağa’nın ve bir sehmi dahi sefîne-i merkūme mellâhîninin beynimizde iktisâm olunmak üzere işbu sene-i mübâreke Muharrem’inin on dokuzuncu günü malımdan mezbûr Ali Ağa’ya mudârebe tarîkıyla beş bin guruş verdiğimde, Meblağ-ı mezbûr ile Ahyolu Burgosu’na sefer eyle beher keyli üçer buçuk guruşa şa‘îr iştirâ ve Âsitâne-i aliyye’ye nakleyle deyip bu vechile ta‘yîn ve tahsîs etdiğimden sonra mezbûr Ali Ağa meblağ-ı mezbûr ile şa‘îr iştirâ etmeyip benim iznimsiz tuz iştirâ edip Trabzon Kazâsı’na nakl ve ondan Abaza diyârına irsâl edip vücûhla te‘addî etmekle re’s-i mâlım olan meblağ-ı merkūm beş bin guruş ile merkūm Ali Ağa’ya polatka ta‘bîr olunur karz verdiğim bin yüz seksen yedi guruş ki cem‘an altı bin yüz seksen yedi guruşu mezbûr Ali Ağa’dan bi-tarîki’d-damân hâlâ taleb ederim deyü da‘vâ etdikde ol dahi cevâbında ber-vech-i muharrer ol-mikdâr guruş kabz eylediğini ve müdde‘î-i mezbûrun vech-i meşrûh üzere ta‘yîn ve tahsîs müdde‘âsını bi-tamamihi tâyi‘an ve kat‘iyyen ikrâr ü i‘tirâf edip lâkin ben zikr olunan Burgos İskelesi’ne vardığımda şa‘îrin beher keyli beşer guruşa bey‘ ü şirâ olunup üçer buçuk guruşa olmadığına binâen ben dahi sermâyecinin kâffe-i husûsda emniyetim zu‘muyla müdde‘î-i merkūmun izinsiz meblağ-ı mezbûr ile beher keyli ikişer guruşa iki bin iki yüz keyl tuz iştirâ ve Lefke ta‘bîr olunur sefîneme tahmîl ve Trabzon İskelesi’ne nakleylediğimde Rusyalı sefâin iskele-i mezbûreye külliyetli tuz getirdiklerine mebnî benim nakleylediğim tuzu şirâya kimesne tâlib olmamağla ben zikr olunan ol-mikdâr tuzu Halatcı Hacı Yakub Ağa’nın üç direkli ta‘bîr olunur sefînesi Abaza diyârına gidecek olmağla beher keyli yüz otuz para hesâbıyla sermâye olarak sefîne-i mezkûreye nakl ve tahmîl ve reisi olan Genc Ali Reis’e teslîm ve kendi âdemlerimden Ebûbekir Reis nâm kimesne ile Nikoli nâm zimmîyi terfîkan mârrü’z-zikr Abaza diyârına irsâl etmemle esnâ-i tarîkde sefîne-i merkūme su gösterip reis-i merkūm ile sâir mellâhları sandala binip sefîne-i mezkûre hamûlesiyle ma‘an gark ve telef olmuşdur deyü takrîr-i meşrûh üzere müdde‘î-i merkūmun şa‘îr iştirâsı’çün ta‘yîn ve tahsîsini mukırr u mu‘terif iken izinsiz meblağ-ı mezbûr ile tuz iştirâsı ve gerek âhar mahalle nakliyle te‘addîsini ikrâr ü i‘tirâf etmeğin alâ-mûcibi i‘tirâfihî meblağ-ı mecmû‘-ı merkūm altı bin yüz seksen yedi guruşu müdde‘î-i merkūm Mustafa Ağa’ya bi-tarîki’d-damân edâsıyla mezbûr Ali Ağa ilzâm olunduğu İstanbul Mahkemesi’nden huzûr. Fî 12 Şa‘bân sene 1223.