İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 574 Hüküm no: 573 Orijinal metin no: [82b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nimetullah bt. Miskci Molla Mustafa’nın babasının mirasından yedi bin kuruşluk malı gizledikleri iddiasıyla üvey annesi Ümmügülsüm ile akrabasından Hadice aleyhine açtığı davada iddiasını ispat edemediği 7.000 guruş men‘ Ma‘rûz Mahrûse-i Galata’ya muzâfe kasaba-i Kasımpaşa’da Tahtakadı mahallesinde sâkin iken altı sene mukaddem fevt olan Miskci Molla Mustafa b. Hasan nâm kimesnenin verâseti zevcesi Ümmügülsüm bt. Ahmed nâm hatun ile sulbî kebîr oğlu Ahmed ve sulbiye kebîre kızları Nimetullah ve Fatma hatunlara ba‘de’l-inhisâr verese-i mezbûrûndan sâhibe-i arzuhâl mu‘arrefetü’z-zât mezbûre Nimetullah Hatun meclis-i şer‘-i münîrde üvey vâlidesi zâtları mu‘arrefe zevce-i mezbûre Ümmügülsüm ile akrabasından Hadice bt. Hasan nâm hatunlar muvâcehelerinde babam mûrisimiz müteveffâ-yı mezbûrun hîn-i vefâtında terekesinden olmak üzere bir siyâh çekmece derûnunda yedi bin guruşluk mahlût altınını zevcesi üvey vâlidem mezbûre ile merkūme Hadice Hatun bi’l-ittifâk ma‘an bi-gayrı hakkın müstakılleten ahz ve ketm ü ihfâ edip hattâ mezbûre Hadice Hatun meblağ-ı merkūmdan üvey vâliden mezbûre husûs-ı mezkûru kimesneye ifşâ etmemek için bana üç yüz elli guruş vermiş idi meblağ-ı mezbûru sana veririm deyü ifâde ve yedime bir kıt‘a temessük i‘tâ etmekle meblağ-ı merkūmdan hisse-i irsiye-i ma‘lûmemi mezbûretândan taleb ederim deyü da‘vâ etdikde onlar dahi külliyen inkâr etmeleriyle müdde‘iye-i mezbûre ber-vech-i muharrer müdde‘âsına ikāmet-i beyyineden izhâr-ı acz [83a] ve talebiyle mezbûretân Ümmügülsüm ve Hadice’den herbirine vech-i şer‘î üzere yemîn verilmeğin mûcebince müdde‘iye-i merkūme Nimetullah Hatun da‘vâ-yı mezkûresiyle mezbûretân Ümmügülsüm ve Hadice hatunlara bilâ-beyyine mu‘ârazadan men‘ olunduğu İstanbul Mahkemesi’nden huzûr. Fî 18 Şa‘bân sene 1223.