İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 587 Hüküm no: 588 Orijinal metin no: [84b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neccar kalfalarından Yağcıoğlu Nikoli’nin beş yüz kuruş alacağı olduğu iddiasıyla İstemat v. Yorgi aleyhine açtığı davada üç yüz kırk kuruş üzerine sulh olduğu 340 guruşa sulh Ma‘rûz Neccâr kalfalarından Yağcıoğlu Nikoli v. Luka nâm zimmî meclis-i şer‘-i hatîrde kezâlik neccâr kalfalarından İstemat v. Yorgi nâm zimmî muvâcehesinde mesfûr İstemat zimmî zimmetinde bâ-temessük cihet-i karzdan beş yüz guruş alacak hakkım olmağla taleb ederim deyü tasaddî eylediğim da‘vâmdan bâ-vesâtet-i muslihîn mesfûr İstemat zimmî ile an-inkâr kat‘a li’n-nizâ‘ üç yüz kırk guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâya müte‘allika âmme-i da‘vâdan mesfûr İstemat zimmînin zimmetini kabûlü hâvî ibrâ ve iskāt eyledim dediğini mesfûr İstemat zimmî tasdîk ve ibrâdan müstesnâ bedel-i sulh-ı mezkûr üç yüz kırk guruş zimmetinde müdde‘î-i mersûma sahîhan deyni olduğunu tâyi‘an ve kat‘iyyen ikrâr ü i‘tirâf etmeğin alâ-mûcibi i‘tirâfihî meblağ-ı merkūm üç yüz kırk guruşun müdde‘î-i mesfûra bi’t-taleb edâsıyla mersûm İstemat zimmî ilzâm olunduğu İstanbul Mahkemesi’nden huzûr. Fî 22 Şa‘bân sene 1223.