İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 586 Hüküm no: 587 Orijinal metin no: [84b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Despino bt. Apostol’un Yağcıoğlu Nikoli’ye verdiği borç paradan iki yüz yetmiş kuruş alacağı olduğu 270 guruşa sulh Ma‘rûz Sâhib-i arzuhâl mu‘arrefetü’ş-şahs Despino bt. Apostol nâm Nasrâniye meclis-i şer‘-i hatîrde derûn-ı arzuhâlde mastûrü’l-ism neccâr kalfalarından Yağcıoğlu Nikoli v. Luka nâm zimmî muvâcehesinde mesfûr Nikoli zimmetinde bâ-temessük cihet-i karzdan beş yüz guruş alacak hakkım olmağla taleb ederim deyü tasaddî eylediğim da‘vâmdan bâ-vesâtet-i muslihîn mesfûr Nikoli zimmî ile an-inkâr kat‘a li’n-nizâ‘ iki yüz yetmiş guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâya müte‘allika âmme-i da‘vâdan mesfûr Nikoli zimmînin zimmetini kabûlü hâvî ibrâ ve iskāt eyledim dediğini mesfûr Nikoli zimmî tasdîk ve ibrâdan müstesnâ bedel-i sulh-ı mezkûr iki yüz yetmiş guruş zimmetinde müdde‘iye-i mesfûreye sahîhan deyni olduğunu tâyi‘an ve kat‘iyyen ikrâr ü i‘tirâf etmeğin alâ-mûcibi i‘tirâfihâ meblağ-ı merkūm iki yüz yetmiş guruşun müdde‘iye-i mesfûreye bi’t-taleb edâsıyla mesfûr Nikoli zimmî ilzâm olunduğu İstanbul Mahkemesi’nden huzûr. Fî 22 Şa‘bân sene 1223.