İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 107 Hüküm no: 41 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müderris Mehmed Seyyida Efendi’nin Mevlevihane Yenikapısı dışındaki ekmekçi fırınının has ekmekçi ve francalacı fırını olduğu Seyyidâ Efendi’nin francalacı fırını fermânı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki İstanbul Hısnı ebvâbından Mevlevîhâne Yenikapısı hâricinde vâki‘ bir bâb ekmekci fırınına mutasarrıf olan müderrisîn-i kirâmımdan kıdvetü’l-ulemâi’l-muhakkıkīn, umdetü’l-fudalâi’l-müdakkıkīn Mehmed Seyyidâ -zîde ilmühû- fırın-ı mezkûrda hâs olarak nân-ı azîz tabh <> ve ibâdullâha füruht olunmak üzere emsâline kıyâsen fırın-ı mezkûr francalacı fırınlarına ilhâk olunmak istid‘âsıyla mübârek Rikâb-ı kamer-tâb-ı hüsrevâneme takdîm eylediği arzuhâli bâlâsına; “Müsâ‘ade oluna.” deyü şeref-yâfte-i sudûr olan hatt-ı hümâyûn-ı mevhibet-makrûnum mûcebince emsâline tatbîk ile tanzîm ve i‘lâm olunmak bâbında sen ki Mevlânâ-yı mûmâ-ileyhsin, senden isti‘lâm olundukda; fırın-ı mezkûrun değirmeni olmayıp koltuk fırınlardan olmağla uncudan dakīk ahzıyla idâresi emr-i asîr olduğundan gâh küşâde ve gâh mesdûd olmağla francalacı fırınına tebdîlinde dâimâ küşâde olup ibâdullâha menfa‘ati olduğunu erbâb-ı vukūf ihbâr etmeleriyle fırın-ı mezkûrun ekmekci fırını olmak üzere Başmuhâsebe’de olan kaydı terkīn olunup ba‘de’l-yevm şeref-rîz-i sudûr olan hatt-ı hümâyûn-ı şevket-makrûnum mûcebince hâs ekmekci ve francalacı fırınlarına ilhâk olunduğunu Kalem-i mezbûra kayd ve mûmâ-ileyhin yedine bir kıt‘a emr-i âlî-şânım i‘tâsı iktizâ eylediğini memhûren i‘lâm eylediğin ecilden i‘lâmın Başmuhâsebe’ye kaydolunmağla mûcebince amel olunmak fermânım olmağın işbu emr-i âlî-şânım ısdâr ve mûmâ-ileyhin yedine i‘tâ olunmuşdur. İmdi ber-vech-i muharrer fırın-ı mezkûrun ekmekci fırını olmak üzere Kalem-i mezbûrdan kaydı terkīn olunduğu ve ba‘de’l-yevm şeref-rîz-i sudûr olan hatt-ı hümâyûn-ı inâyet-makrûnum mûcebince hâs ekmekci ve francalacı fırınlarına ilhâk olunduğu ma‘lûmun oldukda fîmâ-ba‘d fırın-ı mezkûrede francala ve hâs ekmek tabhı husûsuna müdâhale ve ta‘arruz ederi olur ise men‘ u def‘ine mübâderet eylemen bâbında fermân-ı âlî-şânım sâdır olmuşdur. Buyurdum ki: Hükm-i şerîfimle ( ) vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-imtisâl ve lâzımü’l-ittibâ‘ımın mazmûn-ı münîfi birle âmil olasın. Şöyle bilesin alâmet-i şerîfe i‘timâd kılasın. Tahrîren fî 2 min-Rebî‘ülevvel [sene 1218] Kostantıniyyeti’l-mahrûse