İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 133 Hüküm no: 63 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul kazasının 1219 senesi avarız vergisinin toplanması Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Hazîne-i âmirem defterleri mûcebince kazâ-i mezbûrun iki bin yedi yüz bir buçuk ve bir sülüs avârız hânesi olup bin iki yüz on dokuz senesine mahsûb olmak üzere cem‘ ve tahsîli lâzım gelmeğin ( ) der-uhde olunup yedine mühürlü ve nişânlu Mevkūfât defteri sûreti verilmekle imdi mûcebince cem‘ ve tahsîl ettirilmek fermânım olmuşdur. Buyurdum ki: Hükm-i şerîfimle mübâşir vardıkda bu bâbda sâdır olan emrim üzere amel edip dahi sene-i mezbûreye mahsûben kazâ-i mezbûrun ol mikdâr hânesinin beher hânesinden dörder yüz yirmi dokuzar akçe kürekci bedeli avârızları mâlların irsâl olunan mühürlü ve nişânlu Mevkūfât defteri mûcebince cem‘ ve tahsîl ve teslîm-i Tersâne-i âmirem ettirtip hilâf-ı emr u fermân kimesneye te‘allül ve muhâlefet ettirmeyesin ve bundan mâ‘adâ mübâşir-i mezbûrun cihet-i ma‘âşı için her bir avârız hânesinden onar akçe vech-i ma‘âş ve on beş akçe harc-ı Tersâne aldırılıp ve hîn-i tahsîlde avârız için alınan akçenin her yüz on akçesinde bir esedî guruş aldırılıp mîrî için alınan akçeyi aldığı vech üzere aldırtıp bundan ziyâde ve noksan alınmaya ve aldırmayasın. Kesr-i defterden ve noksan-ı hâneden ve fermânımdan ziyâde mutâlebesiyle zulm ü te‘addîden ihtirâz eyleyesin. Şöyle bilesin alâmet-i şerîfe i‘timâd kılasın. Fî 3 Zilka‘de sene [1]218 Kostantıniyye-i mahrûse