İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 195 Hüküm no: 102 Orijinal metin no: [45a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal dükkânlarının akşam vaktinden önce ve pazar ve yortu günlerinde kapatılmaması İstanbul Kādısı Fazîletlü Efendi Bakkāl tâifesi pazar ve yortu günlerini vesîle ederek ve ale’l-husûs bu evânda ikindiden sonraca dükkânlarını seddedip zu‘afâ-yı ibâd zahmet ve meşakkate dûçâr oldukları ihbâr ve tahkīk olunmağla imdi tâife-i merkūmenin pazarbaşılarını celb birle pazar ve yortu günlerinde ve ale’l-husûs akşamdan evvel her hangisi dükkânını sedd ü bend eder ise o makūle hilâf-ı emr-i âlî harekete cesâret eden der-akab dükkânı önüne salb ile cezâsı tertîb ve sâire ibret kılınacağını etrâfıyla ifâde ve tenbîhe ikdâm ve dikkat ve husûs-ı mezkûru taht-ı râbıtaya idhâl ile keyfiyeti huzûrumuza i‘lâm eyleyesiz deyü buyruldu. Fî 7 C sene 1220