İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 195 Hüküm no: 103 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal vs. esnafın yağ, sabun vs. ihtiyaç maddelerini daima dükkânlarında hazır bulundurup halka satmaları, daha yüksek fiyata satmak amacıyla gizlememeleri İstanbul Kādısı Fazîletlü Efendi Lillâhi’l-hamdü ve’l-minne tevârüd etmekde olan yağ ve sabun ve zehâir-i sâire gerek bakkāl ve gerek esnâfı yedleriyle ibâdullâha lüzûmu mikdâr bey‘ olunup muzâyaka çektirilmemek üzere cümleye tenbîh olunmuş iken bakkāl tâifesi evvelâ dûn bahâ ile alıp ziyâdeye satmak için zehâir-i mezbûreyi mahâllinden iştirâdan imtinâ‘ ve sâniyen aldıkları revgan ve sabunu dahi gizlüce ziyâde bahâ ile dilediklerine bey‘ zımnında dükkânlarında ihfâ eyledikleri haber alınmakdan nâşî işbu hareket-i gayr-ı marzıyeye cesâret eden hafe-i? bakkāldan birisi dükkânı önüne salb olunup ba‘d-ezîn dahi hilâf-ı rızâ hareket edenler haklarında emr-i tedîbin icrâsında teehhür olunmayacağı zâhir olmağla imdi pazarbaşı ve bakkāl esnâfını getirtip sabun ve yağ ve zehâir-i sâireyi ale’d-devam ibâdullâha bey‘ için dükkânlarında mevcûd olmak üzere tüccârdan vaktiyle ahzından imtinâ‘ ve tevakkuf etmeyip ve ziyâdeye satmak ve âhar etmek için dükkânlarında ihfâ eylemeyip ibâdullâha lüzûmu mikdâr bey‘ eylemelerini taht-ı râbıtaya idhâl ve bu sûretin hilâfı hareket vukū‘unda ibtidâ pazarbaşı ve sâniyen cesâret eden tedîb olunacağını gereği gibi tefhîm ve bu def‘a bakkāllara verilecek sabunun ne mikdâr fazlası kalır ise onları dahi sabuncu esnâfını kethudâlarıyla celb birle i‘tâ eyleyip dükkânlarında sabun mevcûd olmak ve onlar dahi ketm ve iddihâr dâ‘iyesine düşmemek ve müşterilerine tedrîcî satmak üzere kezâlik râbıtaya bend ve bunlar dahi işbu tenbîhin hilâfı hareketde olurlar ise evvelen kethudâları ve sâniyen cesâret eden bilâ-te’hîr tenkîl olunacağını ifâde birle etrâfıyla ta‘ahhüd ettirip ibâdullâh bir vechile muzâyaka çekmemek vesâilinin istikmâline dikkat eyleyesin deyü buyruldu. Fî 12 min-C sene 1220