İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 200 Hüküm no: 106 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki ekmekçilere temiz, pişkin, beyaz ve kaliteli ekmek üretmeleri hususunda tembihte bulunulması Nân-ı azîze dâir. Bâ-sahh-ı âlî. İstanbul Kādısı Fazîletlü Efendi ve Şıkk-ı Râbi‘ Defterdârı Efendi Dârü’s-saltanati’s-seniyye’de sâkin ibâdullâhın sâye-i merâhim-vâye-i şâhânede pâk ve beyâz nân-ı azîz ekl ve tenâvül ederek husûl-i vesâil-i tena‘um ve refâhiyyetleri ahass-ı matâlib-i mülûkâne olduğuna binâen celb-i zehâir ve hubûbât emr-i ehemmine leyl ü nehâr nisâr-ı nakdîne-i efkâr olunarak mahâll-i ma‘lûme-i mu‘tâde mürettebâtından fazla münakkah ve a‘lâ gālî bahâ ile katı vâfir zehâir dahi celb ve iştirâ olunup mücerred ekmeklerin beyâzlığı ile isticlâb-ı da‘avât-ı ibâd için o makūle zehâir-i münakkahadan dahi ilâve olunarak tevzî‘ olunacak olduğundan bu bâbda gerek ekmekciler ve gerek sâir efrâd-ı âferîdenin diyeceği kalmayıp dirhem tenzîli dahi münakkahlığı cihetiyle iktizâ etmez ise dahi çünkü yalnız Ramazan-ı şerîfe hasr olmayarak ale’d-devam ekmeklerin hâs ve beyâz olmasına i‘tinâ ve dikkat ve ihtimâm ve nezâret olunacağına mebnî ekmekciler tâifesinin dahi hiç özür ve illete ve sâir vechile mel‘anete mahâl bulamamaları için on dirhem tenzîliyle bir paralığı altmış dirhem olmak üzere ruhsat verilip bu vechile müsâ‘ade olmamış iken yine pâk ve beyâz işlemezler ise ve fırınların önünde cem‘iyet görülür ise Hudâ hakkı için siyâset ve tertîb-i cezâdan gayri mu‘âmele olunmayacağı zâhir olmağla imdi habbâzân tâifesini ve kethudâ ve nizâm ustalarını celb ile fîmâ-ba‘d mel‘anet etmeyip verilen nümûne gibi pişkin ve beyâz ve hâs ve a‘lâ işlemelerini ve hangi fırının ekmeği nümûneye uymaz ise tertîb-i cezâ olunacağını tefhîm ve te’kîde mübâderet ve siz dahi ale’d-devam nezâret eyleyesiz deyü buyruldu. Fî 29 Ş sene [1]220