İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 202 Hüküm no: 110 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Kadısı’nın zeytinyağı fiyat ve dağıtımını emirde belirtilen esaslar çerçevesinde tanzim etmesi Revgan-ı zeyt fermânı. İstanbul Kādısı Fazîletlü Efendi ve Gümrük Emîni Ağa Bu sene-i mübârekede lillâhi’l-hamd revgan-ı zeytin kesreti derkâr olup sene-i sâbıkā narhı olan otuz beş paradan tenzîl ile ibâdullâha bey‘ olunmak lâzımeden iken esnâfdan ba‘zı mürtekib ve tama‘kârlar bu esnâda revgan-ı zeyti ziyâde bahâya füruht ile ibâdullâhı mutazarrır eyledikleri ve el-hâletü hâzihî revgan-ı zeytin mahâllinde destisi dörder buçuk guruşa olup bu tarafa gel[m]e masrafıyla beher vakıyyesi otuz beş paraya bâliğ olduğu ve bu dahi turfanda olduğundan bu vechile ziyâdeye mübâya‘a olunduğu tahkīk olunup bu sûretde şimdilik Mart’a kadar tüccâr revgan-ı zeytin beher vakıyyesini bakkālâna iki para ticâret vaz‘ıyla otuz yedi paraya verip bakkāl dahi ibâdullâha otuz sekiz paraya vermek ve Dersa‘âdet’e bu kadar revgan gelmekde ve taşra ve berrânî ve müste’mene verilmek memnû‘âtdan iken vürûd eden bu kadar revganın telef olduğu zâhir olduğundan sebebi lede’t-taharrî havyarcı ve küfeci ve yağhânelerde bezirci tâifeleri külliyetlü yağ alıp diledikleri mahallere bey‘ eyledikleri tahkīk olunduğuna binâen fîmâ-ba‘d bunların men‘-i küllî ile men‘i ve vürûd eden yağların bir dirheminin zâyi‘ ve telef olmamasının hüsn-i râbıtaya idhâli husûsuna irâde-i aliyye ta‘alluk etmekle imdi yağcılar kethudâsı ve tüccârdan iktizâ edenleri huzûr-ı şer‘a celb ve ibtidâ-yı emrde fîmâ-ba‘d bâlâda mezkûr havyarcı ve küfeci ve bezircilere bir dirhem yağ verilmemek ve her kim verir ise cezâsı tertîb olunmak ve Mart’a kadar tüccâr bakkāllara otuz yedi paraya ve bakkāllar dahi ibâdullâha otuz sekiz paraya bey‘ etmek ve zuhûr eden yağların vürûdunda gerek tüccâr ve gerek berrânî, ilmühaberi Gümrük tarafından yağcılar kethudâsı tarafına ve Bâb-ı Âlî’ye verilip derhâl bakkāllara pazarbaşı ma‘rifetiyle tevzî‘ olunmak üzere ta‘ahhüde rabt ve hilâfı hareket edenlerin cezâları tertîb olunacağını tefhîm birle keyfiyeti i‘lâma müsâra‘at eyleyesiz deyü buyruldu. Fî 17 L. sene [1]220