İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 207 Hüküm no: 115 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ve havalisinde 1/2 ekmek ağırlığında olması gereken simidin, 1/3 ekmek ağırlığında üretilip üzerine biraz fazla susam dökülerek yağlı simit diye satılmasına izin verilmemesi Susamlı simid fermânı. Bâ-sahh-ı âlî. İstanbul Kādısı Fazîletlü Efendi Hazretleri Âsitâne-i sa‘âdet ve civârında olan Bilâd-ı Selâse ve tevâbi‘inde vâki‘ çörekci ve simidci tâifesinin tabh ve i‘mâl eyledikleri simid hâs ve tabhı nisâbında ve pişkin olmak üzere vakt ü zamanına göre nân-ı azîzin nısfı vezninde tabh ve i‘mâl olmak kā‘ide-i kadîmeden ve beher kîlesine üç vakıyye yağ vaz‘ıyla tabh olunan yağlı çörek ve yağlı simid dahi nân-ı azîzin sülüsü vezninde hâs ve yağlı ve tabhı nisâbında tâmmü’l-vezn olmak muktezâ-yı şurûtundan iken bu esnâda çörekci ve simidci tâifesi tabh ve i‘mâl eyledikleri simidlere bir mikdâr ziyâdece susam vaz‘ıyla yağlı simid diyerek nân-ı azîzin sülüsü vezninde olan yağlı çörek ve yağlı simide kıyâsen beher paralıkda onar dirhem ve ikişer paralıkda yirmi ve dört paralıkda kırk dirhem noksanıyla tabh ve i‘mâle ictisâr ve ol vechile ızrâr-ı ibâdı mûcib hâlâta ibtidârları meşhûd olmakdan nâşî bi’d-defa‘ât iktizâ edenlere tenbîh ve tehdîd olunmuş iken bu esnâda ancak beşer onar simid dükkânlarında ve destgâhlarında vaz‘ için tâmmü’l-vezn olarak tabh ve i‘mâl ve mâ‘adâ tabla ve küfeler ile esvâk ve pazarda ibâdullâha bey‘ eyledikleri simidleri mücerred noksan işlemeğe vesîle olmak için bir mikdâr ziyâdece susam vaz‘ı hîlesiyle yağlı simide kıyâs ederek nân-ı azîzin sülüsü vezninde tabh ve i‘mâl ile beher paralıkda onar dirhem noksan işlemeğe ısrarları ızrâr-ı ibâdı mûcib olmağla imdi tâife-i merkūmenin fîmâ-ba‘d bu makūle yağlı simid şeklinde nâkısü’l-vezn simid işlemeyip kadîmi üzere susamlıca hâs ve tabhı nisâbında pişkin olarak vakt ü zamanına göre nân-ı azîzin nısfı olmak üzere tâmmü’l-vezn tabh ve i‘mâl eylemelerini tenbîh ve içlerinden ba‘d-ezîn hilâf-ı rızâ harekete mütecâsir olanların tedîbât-ı lâyıkası icrâ olunacağını gereği gibi tefhîm birle tanzîme mübâderet eyleyesiz deyü buyruldu. Fî 16 Zilhicce sene [1]220