İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 208 Hüküm no: 117 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul, Galata ve Eyüp bölgesinde Padişah için kuş avlayan çakırcı avcılara Bostancı Ahmed b. Mehmed’in Sayyadbaşı tayin edildiği Hâssa Çakırcıbaşı Ağa tarafına verilen Sayyâdbaşı fermânıdır. Akzâ kuzâtü’l-Müslimîn, evlâ vülâti’l-muvahhidîn, ma‘âdinü’l-fezâili ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassûne bi-mezîd-i inâyeti’l-Meliki’l-mu‘în İstanbul ve Galata ve Hâslar kādıları -zîdet fezâilühüm- ve iftihârü’l-emâcid ve’l-ekârim, câmi‘ü’l-mahâmid ve’l-mekârim, el-muhtassu bi-mezîd-i inâyeti’l-Meliki’d-dâim Hâssa Bostancıbaşısı ( ) -dâme mecduhû- ve mefâhirü’n-nüvvâbi’l-müteşerri‘în ( ) ve ( ) ve ( ) nâibleri -zîde ilmühûm- ve mefâhirü’l-emâsil ve’l-akrân serdâr ve sâir a‘yân-ı vilâyet ve iş erleri -zîde kadrühum- tevkī‘-i refî‘-i hümâyûn vâsıl olucak ma‘lûm ola ki İftihâru’l-emâcid ve’l-ekârim bi’l-fi‘il Hâssam Çakırcıbaşısı Mehmed Emin -dâme mecduhû-nun Dîvân-ı Hümâyûn’uma takdîm eylediği memhûr arzı mefhûmunda nefs-i nefîs-i hümâyûnum için İstanbul ve Galata ve Hâslar etrâfında sagīr ve kebîr kuşları sayd u şikâr eylemek üzere Hâssa Çakırcı sayyâdları beher sene sayd eyledikleri şikârları vakt ü zamanıyla Çakırcı Ocağına edâ ve teslîm eylemeleri lâzıme-i zimmet-i me’mûriyetlerinden iken bir müddetden beri sayd eyledikleri şikârları Ocağ-ı mezbûra getirmediklerinden şikâr-ı hümâyûnumun kılletine bâ‘is olmalarıyla Üsküdar tarafı misillü üzerlerine bir sayyâdbaşı nasb u ta‘yîni ehemm ü elzem olmağla Hâssa Çakırcı sayyâdlarından Bostânî Ahmed b. Mehmed -zîde kadrühû- Sayyâdbaşı nasb u ta‘yîn olunmağla beher sene sayd eyledikleri şikârları vakt ü zamanıyla edâ ve teslîm eylemek şartıyla ber-mu‘tâd-ı kadîm hizmet-i lâzımesine Hâssa hasekileri ve bostânî ustaları ve koru ağaları ve voyvoda adamları ve subaşıları ve sâir ehl-i örf tâifesi taraflarından tüfengine ve sayd u şikâ[r]ına bir türlü müdâhale ve ta‘arruz olunmamak için Üsküdar tarafına verilen emr-i şerîfim mûcebince Sayyâdbaşı-i merkūmun yedine dahi emr-i şerîfim i‘tâsını tahrîr ve istid‘â eylediği ecilden Hazîne-i âmiremde mahfûz Çakırcı defterlerine nazar olundukda nefs-i nefîs-i hümâyûnum için Üsküdar ve Gekbuze ve sâir kazâ ve nâhiyelerde ve sâir mahallerde sayd u şikâr eyleyip taraf-ı âhardan müdâhale ve ta‘arruz olunmamak için Çakırcıyân-ı hâssam Ocağı tarafından ta‘yîn olunan Sayyâdbaşı yedine bin iki yüz on senesi evâsıt-ı Safer’inde emr-i şerîfim verildiği ve Hâssa Çakırcı Ocağının umûr u husûslarının rü’yeti ve berevât ve evâmir-i şerîfenin i‘tâsı ancak mûmâ-ileyhin memhûr arzıyla olagelmekle Çakırcıbaşı-i mûmâ-ileyhin arzı ve derkenârı mûcebince emr-i şerîfim i‘tâsı iktizâ eylediği derkenâr olunmağla imdi derkenârı mûcebince amel olunmak bâbında fermân-ı âlî-şânım sâdır olmuşdur. Buyurdum ki: Hükm-i şerîfim vardıkda bu bâbda sâdır olan emrim üzere amel edip dahi siz ki mevâlî-i ızâmım ve Bostancıbaşı ve nüvvâb ve sâir-i mûmâ-ileyhimsiz, zikrolunan mahallerde nefs-i nefîs-i hümâyûnum için sayd u şikâr eylemek üzere merkūm Ahmed -zîde kadrühû- Sayyâdbaşı nasb u ta‘yîn olunmuş olduğu ma‘lûmunuz oldukda Sayyâ[d]başı-i merkūmun sayd u şikâr eylediği avlarına ve tüfengine taraf-ı âhardan bir türlü müdâhale ve ta‘arruz ettirmeyesiz. Şöyle bilesiz alâmet-i şerîfe i‘timâd kılasız. Fî 2 min-Muharremi’l-harâm sene 1221 Be-mahrûse-i Kostantıniyye