İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 210 Hüküm no: 118 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhasebeci Şaban Efendi Vakfı’na ait 1 adet ev ile Nakşibendî Zaviyesi Şeyhi İsmail Nizamî’nin mülkü olan 2 adet evin istibdaline izin verildiği İstibdâl fermânıdır. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Zikri âtî husûsun mahâllinde bi’l-mu‘âyene keşfi için kıbel-i şer‘den mürsel Kâtib-i sânî kıdvetü’l-ulemâi’l-muhakkıkīn Merhabâzâde Mahmud -zîde ilmühû- Hâssa Mi‘mârı hulefâsından Mustafa ve Mehmed halîfeler ile medîne-i hazret-i Ebî Eyüb el-Ensârî -radıye anhü Rabbühü’l-Bârî-de Nişâncılar mahallesinde vâki‘ Nakşibendî Zâviyesi’ne varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm ettikde İstanbul kādıları nezâretlerinde olan evkāfdan Muhâsebeci Şa‘bân Efendi Vakfı’nın Mütevellîsi Mehmed Emin b. İsmail meclis-i ma‘kūd-ı mezkûrda zâviye-i mezkûrede post-nişîn olan kıdvetü’s-sulehâi’s-sâlikîn eş-Şeyh es-Seyyid Mustafa Selâmi b. eş-Şeyh İsmail Nizâmî -zîde takvâ[hü]- mahzarında; mütevellîsi olduğum merkūm Muhâsebeci Şa‘bân Efendi Vakfı’ndan şehriye altmış akçe icâre-i müecceleli mûmâ-ileyh Şeyh Selâmi’nin tasarrufunda olan mahalle-i mezbûrede vâki‘ bir tarafdan Bostânî Abdi tasarrufunda olan vakıf menzil ve bir tarafdan hammâm külhanı [50a] ve bir tarafdan Zâviye-i mezkûre bahçesi ve bir tarafdan tarîk-ı âmm ile mahdûd inhidâma mâil fevkānî bir bâb oda ve bir münhedim oda ve kenîf ve âbdesthâne ve bir sagīr mâbeyn odası ve dehliz ve dâhiliyede tahtânî dört bâb oda ve sedli sofa ve kenîf ve âbdesthâne ve mağsel ve sokak kapısını müştemil bir bâb menzil yine mûmâ-ileyhin bâ-hücec-i şer‘iye yedinde müstakillen mülkü olan medîne-i mezbûrede Zâlpaşa kurbünde Silâhî Mehmed Bey mahallesinde vâki‘ birbirine muttasıl bir tarafdan horasancı kârhânesi ve bir tarafdan Yağcı Hâfız menzili ve bir tarafdan tarîk-ı âmm ve bir tarafdan tarîk-ı hâs ile mahdûd fevkānî iki bâb oda ve bir sagīr hammâm ve bir sagīr sandık odasını müştemil bir bâb menzil ile diğer menzil fevkānî iki bâb oda ve nerdübân ve tahtânî iki bâb oda ve bir kilâr ve kenîf ve âbdesthâne ve sofa ve matbah ve bir mikdâr bahçeyi müştemil bir bâb ki iki bâb menzil ile istibdâl murâd olunmağla Kâtib-i mezbûr ve mi‘mârân-ı mezbûrân evvelen vakıf menzil üzerine varıp ehl-i vukūf Müslimîn hazır oldukları hâlde keşf ve mesâha ve tahmîn eylediklerinde menzil-i mevkūf-ı mezkûre arsası terbî‘an altı yüz altmış zirâ‘ on beş parmak olup beher zirâ‘ı on ikişer akçe ve üzerinde inhidâma mâil enkāzı dört yüz seksen akçe ve matbah mahalli beher zirâ‘ı iki yüz kırk akçe ve bi’r-i mâ’ kıymeti üç bin akçe ki cem‘an arsa ve inhidâma mâil enkāz ve bi’r-i mâ’ kıymetleri bir yük doksan iki bin dokuz yüz doksan akçeye bâliğ oldukdan sonra mülk sagīr menzil-i merkūm üzerine varıp kezâlik keşf ü mesâha ve tahmîn ettiklerinde arsa-i memlûke terbî‘an yüz elli dört zirâ‘ dört parmak beher zirâ‘ı yüz seksen akçe ve üzerinde mevcûd ebniyesinin beher zirâ‘ı bin sekiz yüz akçe ve matbah beher zirâ‘ı üç yüz altmış akçe ki cem‘an iki yük kırk bin altmış akçe ve diğer kebîr mülk menzil terbî‘an üç yüz on iki zirâ‘ beher zirâ‘ı yüz seksen akçe ve üzerinde mevcûde ebniyesinin beher zirâ‘ı bin iki yüz akçe ve bi’r-i mâ’ kıymeti üç bin akçe ve sekiz taş duvar kıymeti üç bin altı yüz akçe ki cem‘an iki yük elli bir bin sekiz yüz yirmi akçe ki menzileyn-i mezkûreyn kıymetleri cem‘an dört yük doksan bin sekiz yüz akçeye bâliğ ve ol vechile mülk olan menzileyn-i mezkûreyn bâlâda tafsîl ü beyân olunan inhidâma mâil menzil-i mevkūf-ı mezkûrdan vüs‘at ü rey‘ ve kıymet ü rağbet cihetlerinden ezyed ve evfer olup istibdâli cânib-i Vakf’a enfa‘ ve evlâ olduğunu mi‘mârân-ı mezbûrân ve sâir ehl-i vukūf Müslimîn haber verdiklerini Kâtib-i mezbûr mahâllinde ba‘de’t-tahrîr Mütevellî-i mezbûr menzil-i mevkūf-ı mezkûru mülk olan menzileyn-i mezkûreyn ile istibdâle izn-i hümâyûnumu müş‘ir tuğrâ-yı garrâ ile mu‘anven emr-i şerîfim sudûrunu sen ki Mevlânâ-yı mûmâ-ileyh Mîr Abdullah -zîdet fezâilühû-sun, i‘lâm etmenle i‘lâmın mûcebince amel olunmak fermânım olmağın imdi ber-vech-i muharrer mülk olan menzileyn-i mezkûreyn vakıf olan menzil-i mezbûrdan kıymeten ve rağbeten ve mahallen ve ücreten ve vüs‘aten ezyed ve evfer ve istibdâli cânib-i vakfa min-külli’l-vücûh enfa‘ ve evlâ olup şerâit-ı istibdâl vücûh ile istibdâli tecvîz eyleyen fukahâ-i zevi’l-ibtihâcın kavilleri üzere mülk olan menzileyn-i mezkûreyn vakıf ve vakıf olan menzil mülk olmak <<üzere>> ve Vakf-ı evvelin şurûtu Vakf-ı sânîde icrâ olunmak üzere tarafeyne hüccet-i şer‘iye verilmek bâbında fermân-ı âlî-şânım sâdır olmuşdur. Buyurdum ki: Hükm-i şerîfimle vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından gāyetü’l-gāye hazer ve mücânebet eyleyesin. Şöyle bilesin alâmet-i şerîfe i‘timâd kılasın. Tahrîren fi’l-evâili şehri Muharremi’l-harâm sene ihdâ ve işrîn ve mieteyn ve elf. Be-makām-ı Kostantıniyyeti’l-mahrûse