İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 213 Hüküm no: 120 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da Valide Hanı’nda yerleşik Sakızlı Kostantin Ciko v. Matyo’ya verilen Avrupa tüccarı beratının İstanbul Bab Mahkemesi’ne kaydedilmesi Avrupa tüccârı beratı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki El-hâletü-hâzihî berren ve bahren Avrupa ticâretiyle me’lûf olanlar ve bundan böyle izhâr-ı hâhiş ve arzu eden Devlet-i aliyyemin ehl-i zimmet re‘âyâsının ticâretlerinin taht-ı râbıta ve nizâma idhâlleri husûsuna irâde-i kerâmet-ifâde-i mülûkânem ta‘alluk edip tâife-i mersûmenin ticâretleri Avrupa diyârlarına münhasır olmağla müste’men tercümanları ve hizmetkârlarının nâil oldukları imtiyâz ve emniyet ve müsâ‘ade ve ri‘âyet tamamen bunların haklarında bilâ-istisnâ icrâ kılınması rüsûm-ı ra‘iyyet-perverîden olduğu ecilden o makūle Avrupa tâcirlerine ve hizmetkârlarına şurût-ı lâzıme derciyle yedlerine başka başka berevât ve evâmir i‘tâ olunması husûsu bâ-hatt-ı hümâyûn verilen şurût-ı nizâmdan olduğuna binâen tüccâr-ı merkūmenin vekîli, Der-aliyye’mde Vâlide Hanı’nda mütemekkin Sakızlı Kostantın Ciko v. Matyo yedlerine şurût-ı nizâm üzere mufassal ve meşrûh ticâret beratı i‘tâ olunduğu beyânıyla ber-mûceb-i şurût-ı nizâm yedine verilen berat-ı şerîfim İstanbul Bâb Mahkemesi’ne kayd ve mûceb ü muktezâsıyla amel ve hareket ve himâyet ü sıyânet olunmak bâbında emr-i şerîfim sudûrunu vekîl-i mersûm memhûr arzuhâliyle istid‘â eylediğin hademe-i Devlet-i aliyyemden olup tüccâr-ı merkūmenin üzerlerine nâzır nasb u ta‘yîn olunan Dîvân-ı Hümâyûn’um Beylikcisi kıdvetü’l-emâcid ve’l-ekârim es-Seyyid Ahmed Safî -zîde mecduhû- bir kıt‘a memhûr takrîriyle ifâde etmekle vech-i meşrûh üzere amel olunmak fermânım olmağın imdi ber-minvâl-i muharrer [mersûm] Avrupa tüccârından olmak üzere ber-mûceb-i şurût-ı nizâm yedine verilen berat-ı âlî-şânımı İstanbul Bâb Mahkemesi’ne sebt ü kayd birle yedinde ibkā ve mûceb ü muktezâsı üzere amel ve hareket ve himâyet ü sıyânet olunmak ve mugāyir-i şurût-ı berat hâlât tecvîz olun[ma]mak bâbında fermân-ı âlî-şânım sâdır olmuşdur. Buyurdum ki: Hükm-i şerîfimle vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından tehâşî ve mübâ‘a[de]t eyleyesin. Şöyle bilesin alâmet-i şerîfe i‘timâd kılasın. Tahrîren fi’l-evâili Zilhicce sene 1220 Kostantıniyyeti’l-mahrûse