İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 262 Hüküm no: 163 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anton v. Kostantin’e, bazı Osmanlı Devlet adamlarına yaptığı hizmetlerden dolayı cizye muafiyeti tanındığı Cizyeden mu‘âfiyet fermânıdır. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki İstanbul sâkinlerinden Anton v. Kostantın zimmî Dîvân-ı Hümâyûn’uma arzuhâl edip mesfûr zimmî ba‘zı ricâl-i Devlet-i aliyyem hizmetinde istihdâm olunan re‘âyâdan olup hizmeti mukābili yalnız cizye-i şer‘iyeden mu‘âf olunmasını inhâ ve fîmâ-ba‘d cizyedârlar tarafından cizye evrâkı tevzî‘iyle rencîde ve te‘addî olunmamak bâbında bir kıt‘a emr-i şerîfim sudûrunu tahrîr ve istirhâm eylediği ecilden Hazîne-i âmiremde mahfûz Cizye Muhâsebesi defterlerine nazar olundukda, ehl-i zimmet re‘âyâlarından ba‘zıları Devlet-i aliyyem hizmetinde vücûda gelen mahâretleri mukābili veyâhûd pîr ü fânî ve amel-mânde olup bir vechile kâr u kisbe iktidârı olmayan kefere yalnız cizye-i şer‘iyeden mu‘âf olmak üzere emr-i şerîfim verilegeldiği mukayyed olmağla ancak istid‘â olunduğu üzere emsâl-i mahsûsası kaydı bulunmadığı derkenâr olundukda imdi istid‘âsı üzere sâire sirâyet etmemek şartıyla yalnız cizye-i şer‘iyeden mu‘âfiyeti için fermân-ı âlî-şânım sâdır olmuşdur. Buyurdum ki: Hükm-i şerîfim vardıkda bu bâbda sâdır olan emrim üzere amel edip dahi zimmî-i mesfûr ba‘zı ricâl-i Devlet-i aliyyem hizmetinde istihdâm olunan re‘âyâdan olup hizmeti mukābili yalnız cizye-i şer‘iyeden mu‘âf olmağla sâire sirâyet etmemek şartıyla fîmâ-ba‘d cizyedârlar taraflarından mugāyir-i emr-i âlî-şânım cizye evrâkı tevzî‘iyle zimmî-i mesfûru rencîde ve te‘addî ettirmeyesin. Şöyle bilesin alâmet-i şerîfe i‘timâd kılasın. Tahrîren fî-gurreti Rebî‘ülâhir sene [1]221 Kostantıniyyeti’l-mahrûse