İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 263 Hüküm no: 164 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da Büyük Yeni Han’da yerleşik Selanikli Yorgi v. Hristodolo ile Valide Hanı’nda yerleşik Sakızlı Yani Rodokanaki v. Kozi’nin, Avrupa tüccârlarına vekil tayin edildikleri Avrupa tüccârları üzerlerine 2 nefer vekîl nasbı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki El-hâletü-hâzihî berren ve bahren Avrupa ticâretiyle me’lûf olanlar ve bundan böyle dahi izhâr-ı hâhiş ve arzu eden Devlet-i aliyyemin ehl-i zimmet re‘âyâsının ticâretleri taht-ı râbıta ve nizâma idhâl olunduğu sûretde ticâretlerine vüs‘at gelip hem tâife-i mesfûreye ve hem gümrükler îrâdına menâfi‘-i kesîreyi mûcib olacağı umûr-ı vâzıhadan olmağla re‘âyâ-yı Devlet-i aliyyemden Avrupa ticâretine hâhişger olan tüccâr beynlerinde cümlenin inzimâm-ı re’y ve intihâbıyla iki nefer vekîller nasb u ta‘yîn kılınıp beynlerinde umûr-ı muhâsebe ve kavâ‘id ve husûsât-ı sâire-i ticâretde nâfizü’l-kelim olmaları ve bâkīsi mersûm vekîllerin re’ylerine mütâba‘at ile muhâlif-i kavâ‘id-i mer‘iyye-i ticâret harekâta mütecâsir olanların iktizâ eden tedîbleri esnâfca icrâsına vekîlân-ı mersûmânın [66a] me’zûniyet ve me’mûriyetleri derc ve tasrîh oluna[rak] nâzırlarının takrîr ve istid‘âsıyla bu bâbda başkaca fermân-ı âlî ısdâr ve beher sene mersûm vekîller tebdîl olunup cümlenin ma‘rifet ve intihâbıyla âharları yine bâ-emr-i âlî ta‘yîn olunmak husûsu bâ-hatt-ı hümâyûn verilen şurût-ı nizâmdan olduğuna binâen tüccâr-ı mersûmenin bu def‘a Derbâr-ı şevket-karâr-ı mülûkâneme takdîm eyledikleri bir kıt‘a mahzar-gûne arzuhâllerinde berevât-ı şerîfemle Avrupa ticâretine me’zûn re‘âyâ-yı Devlet-i aliyyemden Dersa‘âdet’imde Büyük Yeni Han’da mütemekkin Selanikli Yorgi v. Hristodolo ve yine tüccâr-ı mersûmeden Der-aliyye’mde Vâlide Hanı’nda mütemekkin Sakızlı Yani Rodokanaki v. Kozi nâm iki nefer tâcirler işbu sene-i mübâreke Haziran’ı ibtidâsından i‘tibâr ile bir sene-i kâmile umûr-ı vekâleti rü’yet eylemek üzere cümlesinin re’y ve ma‘rifetleriyle intihâb olunduğu beyânıyla ber-mûceb-i şurût-ı nizâm vekîl nasb u ta‘yîn olunmaları bâbında vekâleti hâvî emr-i şerîfim i‘tâsını istid‘â eylediklerin hademe-i Devlet-i aliyyemden Dîvân-ı Hümâyûn’um Beylikcisi olup Avrupa Tüccârı Nâzırı olan kıdvetü’l-emâcid ve’l-ekârim es-Seyyid Ahmed Safî -zîde mecduhû- bir kıt‘a memhûr takrîriyle ifâde etmekle tâcirân-ı mersûmân vech-i meşrûh üzere tüccâr-ı mersûmeye vekîl nasb u ta‘yîn olunmak fermânım olmağın imdi ber-mûceb-i şurût-ı nizâm tâife-i mersûmenin beynlerinde vâki‘ olan umûr-ı muhâsebe ve husûs-ı sâirelerin [bir] sene-i kâmile vekîlân-ı mersûmân rü’yet ve tüccâr-ı mersûme dahi re’ylerine mütâba‘at ve kavâ‘id-i mer‘iyye-i ticârete münâfî harekâta mübâderet edenlerin nâzır-ı mûmâ-ileyh ma‘rifetiyle levâzım-ı tedîblerinin icrâsı için üzerlerine mersûmân vekîl nasb u ta‘yîn kılındığı [ve] mersûmânın vekâleti umûruna kimesne tarafından müdâhale ve ta‘arruz olunduğuna rızâ-yı aliyyem olmadığı sen ki mevlânâ-yı mûmâ-ileyhsin, ma‘lûmun oldukda ber-vech-i meşrûh amel ve harekete dikkat olunmak ve hilâf-ı şurût ve münâfî-i emr ü rızâ vaz‘ ve hâlât tecvîz olunmamak bâbında fermân-ı âlî-şânım sâdır olmuşdur. Buyurdum ki: Hükm-i şerîfimle vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından tevakkī ve mübâ‘adet eyleyesin. Şöyle bilesin alâmet-i şerîfe i‘timâd kılasın. Tahrîren fi’l-evâhiri şehri Rebî‘ülûlâ sene 1221 Kostantıniyyeti’l-mahrûse