İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 274 Hüküm no: 172 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da Valide Hanı’nda yerleşik Acem, Hindistan ve Avrupa tüccarı beratı sahibi Kostantin Guloko v. Yorgi’nin hizmetçisi Iskarlato Maksimo v. Todori’nin, avarız vs. mali yükümlülüklerden muaf olduğu Acem ve Hindistan ve Avrupa tüccârı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki El-hâletü-hâzihî berren ve bahren Acem ve Hindistan ve Avrupa ticâretiyle me’lûf olanlar ve bundan böyle izhâr-ı hâhiş ve arzu eden Devlet-i aliyyemin ehl-i zimmet re‘âyâsının ticâretlerinin taht-ı râbıta ve nizâma idhâlleri husûsuna irâde-i kerâmet-ifâde-i mülûkânem ta‘alluk eylediği cihetden müste’men tercümanları ve hizmetkârlarının nâil oldukları imtiyâzât ve emniyet ve müsâ‘ade ve ri‘âyet tamamen bunların haklarında bilâ-istisnâ icrâ kılınması rüsûm-ı ra‘iyyet-perverîden olduğu ecilden bu makūle Acem ve Hindistan ve Avrupa tâcirleri ve hizmetkârları yedlerine başka başka berevât ve evâmir i‘tâ olunması husûsu bâ-hatt-ı hümâyûn-ı inâyet-makrûn verilen şurût-ı nizâmdan ve defterlü tüccârdan Der-aliyye’mde Vâlide Hanı’nda mütemekkin Kostantın Guloko v. Yorgi nâm tâcir yedine şurût-ı nizâm üzere mufassal ve meşrûh ticâret beratı i‘tâ olunmuş olunduğuna binâen Devlet-i aliyyem cizye-güzârlarından olmak üzere mersûmun iki nefer hizmetkârlarından Iskarlato Maksimo v. Todori nâm bir nefer hizmetkârı şurût-ı beratı mûcebince himâyet ü sıyânet olunmak bâbında emr-i şerîfim sudûrunu tüccâr vekîlleri memhûr arzuhâlleriyle istid‘â eylediklerin hademe-i Devlet-i aliyyemden olup tüccâr-ı mersûmenin nâzırı olan Dîvân-ı Hümâyûn’um Beylikcisi kıdvetü’l-emâcid ve’l-ekâri[m] es-Seyyid Ahmed Safî -zîde mecduhû- bâ-takrîr ifâde [69b] etmekle Dîvân-ı Hümâyûn’umda mahfûz nişân kaydına mürâca‘at olundukda mersûm Kostantın Guloko v. Yorgi Acem ve Hindistan ve Avrupa tüccârından olmak üzere işbu sene-i mübâreke evâil-i Rebî‘ülâhirinde yedine mufassalan berat verildiği mukayyed ve müste’menânın beratlu tercümanları ve hizmetkârları misillü bunların oğulları ve başka başka yedlerine evâmir-i şerîfem verilen iki nefer hizmetkârları ancak avârız ve kassâbiye akçesi ve sâir rüsûm ve tekâlîf-i örfiye teklîfiyle te‘addî ve rencîde olunmamaları tâcir-i mersûmun beratında münderic idiği tahrîr olunmağla vech-i meşrûh üzere amel olunmak fermânım olmağın imdi tâcir-i mersûmun iki nefer hizmetkârlarından mesfûr Iskarlato Maksimo v. Todori tâcir-i mersûmun hizmetinde oldukça mugāyir-i şurût-ı berat mutâlebât-ı mezkûre [ile] te‘addî ve rencîde ettirilmeyip ber-mûceb-i şurût-ı berat himâyet ü sıyânet olunmak bâbında fermân-ı âlî-şânım sâdır olmuşdur. Buyurdum ki: Hükm-i şerîfimle vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından hazer ve mücânebet eyleyesiz. Şöyle bilesiz alâmet-i şerîfe i‘timâd kılasız. Tahrîren fi’l-evâsıtı şehri Rebî‘ülâhir sene [1]221 Kostantıniyyeti’l-mahrûse