İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 293 Hüküm no: 190 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İpek, kumaş ve ayakkabı satışında narha uymayanların cezalandırılacağı İstanbul Kādısı Fazîletlü Efendi İpek ve akmişe ve haffâf metâ‘ına bundan akdem iki yüz on dokuz senesi evâilinde vaz‘-ı fiyât ile nizâma rabt ve sicillâta kaydolunmuş iken bu esnâda yine narh-ı mezkûra adem-i ri‘âyet ve ziyâde[ye] füruht ile ızrâr-ı ibâda cesâret etmekde oldukları tahkīk olunup ancak cemî‘ zamanda işbu narh maddesine dikkat lâzıme-i zimmet ve hilâfı harekete cesâret edenlerin tedîbât-ı şedîdelerine mübâderet vâcibe-i maslahatdan olmağla imdi fîmâ-ba‘d gerek haffâflardan ve gerek ipekci ve kumaşcılardan her kim narh-ı müseccelden bir para ziyâdeye füruhta cesâret eder ise derhâl tertîb-i cezâ olunmak için taharrî ve tecessüs olunmakda idiğini esnâf-ı merkūme kethudâlarına ve sâir iktizâ edenlere etrâfıyla ifâde ve tefhîm ve narh üzere füruht eylemelerini cümleye tenbîh ve te’kîd ile sûret-i nizâmını huzûrumuza i‘lâma mübâderet eyleyesiz deyü. Fî 12 Ca sene [1]221