İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 292 Hüküm no: 189 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başkalarının odunlarını zapt eden, müşterilerden haksız yere para alan ve onların hamam çalışanlarına verdiği paralara el koyan hamamcıların cezalandırılacağı İstanbul Kādısı Fazîletlü Efendi ( ) ve İzzetlü Yeniçeri Ağası İmrahor Hammâmcısı Mustafa ve Kazasker Hammâmcısı Salih ve Tiytab Hammâmcısı İsmail kendi hammâm odunlarından başka âharın getirdiği hatabları dahi zabt ve dilediklerine füruht eylediklerinden başka nisvân hammâmı dellâkleri ve sâir hademesinin müşterilerden şerbetlik nâmıyla aldıklarını yedlerinden almak ve cihât-ı sâire ile dahi cerr-i nef‘e vesîle etmek için mîrîye rüsûm vereceğiz misillü erâcîf-i mütenevvi‘a ilkā ve hammâma gelen Müslim ve zimmîlerden hilâf-ı mu‘tâd mutâlebâta ve envâ‘ tahkīr-gûne mu‘âmelâta ictirâ eyledikleri tahkīk olunmakdan nâşî tedîbleriyle sâirlerin terhîbi lâzımeden olduğundan mezbûrlar diyâr-ı âhara nefy ve kal‘a-bend olunmağla imdi hammâmcılar kethudâsı ve esnâfından sâir iktizâ edenleri celb ve keyfiyeti ifâde ve bundan sonra bir hammâmcı âharın hatab ve levâzımına ta‘arruz eder ve erâcîf-i mezbûre ile şimdiye kadar hammâmlarda mu‘tâd olan vereceklerden ziyâde bir nesne taleb ve müşterileri tazyîk ve hademenin mu‘tâd olan alacaklarına müdâhale eyler olur ise lede’t-tahkīk hammâmcı nefy ve tedîb ve hammâmı zabtolunacağı tefhîm ile o makūle harekâtdan men‘ ve tahzîr ve kadîm ve mu‘tâda münâfî hâlâtdan mübâ‘adetlerini tenbîh ve te’kîd eyleyesiz deyü. Fî 23 Ca sene [1]221