İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 295 Hüküm no: 193 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgaki isimli tâcirin borçlarının tek seferde ödeyemeyeceği hukuken sabit olur ise taksitlendirilmesi Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în Mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki İstanbul mütemekkinlerinden tüccâr tâifesinden Yorgaki nâm zimmî Südde-i sa‘âdetime arzuhâl edip; bu Der-aliyye’m sekenesinden yirmi nefer ma‘lûmü’l-ism kimesnelerden Anaştaş nâm zimmî kefâletiyle istikrâz eylediği kırk iki bin guruşu def‘aten edâ-yı deyne bir vechile kudreti olmayıp taksît ve tedrîc ile edâ-yı deyne râzı olup def‘aten talebi ve ahz ü habs teklîfiyle te‘addî olunmak îcâb etmez iken dâyinleri merkūmlar def‘aten talebi ve ahz ü habs teklîfiyle te‘addî ve rencîdeden hâlî ol[ma]dıkların inhâ [edip] men‘ u def‘i [76b] bâbında emr-i şerîfim sudûrunu istid‘â ve Dîvân-ı Hümâyûn’umdan şurûtu lede’s-suâl bu makūle def‘aten edâ-yı deyne adem-i kudreti dâyinleri muvâcehesinde sâbit olan medyûnun taksît-i şer‘î ile edâ-yı deyn eylemesi için emr-i şerîf verilegeldiği tahrîr olunmağla şurûtu mûcebince amel olunmak fermânım olmağın imdi sen ki mevlânâ-yı mûmâ-ileyhsin, husûs-ı mezbûra tamam mukayyed olup göresin: İnhâ olunduğu üzere mesfûrun def‘aten edâ-yı deyne adem-i kudreti dâyinleri muvâcehesinde şer‘an sâbit ve mütehakkık olduğu hâlde taksît-i şer‘î ile edâ-yı deyn ettirtip dâyinleri merkūmları def‘aten talebi ve ahz ü habs teklîfiyle te‘addî ve rencîde ettirmeyip men‘ u def‘e mübâderet ve hilâf-ı fermân vaz‘ı tecvîzden ittikā ve mübâ‘adet olunmak bâbında fermân-ı âlî-şânım sâdır olmuşdur. Buyurdum ki: Hükm-i şerîfim vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından hazer ve mücânebet eyleyesiz. Şöyle bilesiz alâmet-i şerîfe i‘timâd kılasız. Tahrîren fî-evâhiri şehri Cumâdelâhir li-sene ihdâ ve işrîn ve mieteyn ve elf. El-Kostantıniyyeti’l-mahrûse