İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 296 Hüküm no: 194 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Hristooğlu Yorgi isimli tâcirin borçlarının, mahkemede alacaklıları ile vardığı anlaşma gereğince 6 yıl içerisinde ödenmek üzere taksitlendirildiği Tecîl. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în bi’l-fi‘il İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Âsitâne-i aliyyemde Perdahtcılar Hanı’nda mütemekkin tüccâr tâifesinden olup düyûn-ı kesîreye giriftâr olduğuna mebnî on mâhdan beri ticâretini terk eden Terzi Hristooğlu Yorgaki nâm zimmînin bâ-defter-i müfredât ma‘lûmü’l-esâmî kimesnelere üç yüz bin guruş mikdârı düyûn-ı müteferrikası olmağla bundan akdemce yedinde bulunan emvâl ü eşyâ yevm-i tevzî‘de olan kıymetleriyle takvîm olunarak dâyinleri beynlerinde alacaklarına mahsûben bi’t-terâzî iktisâm olunmuş olmağla ol vechile düyûn-ı muharrere-i mezkûresinden gayr-ı ez-teslîmât sahhu’l-bâkī kırk bir bin sekiz yüz seksen guruş otuz para düyûn-ı müteferrikası olup zimem-i nâsda bâkī kalan hukūkunu tahsîl ile îfâ-yı deyne mütevakkıf olmağla ol vechile düyûn-ı bâkī-i mezkûresini hâlen ve def‘aten edâya kudreti olmadığına binâen taksît ve tedrîc ile edâ-yı deyne müte‘ahhid olmağla dâyinleri taraflarından def‘aten mutâlebe ve ahz ü habs teklîfiyle te‘addî ve rencîde ettirilmemek bâbında sâdır olan fermân-ı âlî-şânıma imtisâlen zimmî-i mesfûrun dâyinlerinden ber-vech-i âtî cihet-i karzdan yedi yüz kırk dokuz guruş iddi‘â eden Terzi Komyanos v. Yorgi ve cihet-i mezkûreden beş yüz altmış yedi guruş iddi‘â eden Silâhdâr Hanı’nda mütemekkin Sarrâf Timbu v. Mergel ve sevâî semeninden sekiz yüz kırk beş guruşdan bâkī yüz seksen bir guruş on para iddi‘â eden Bezzâz Dimitri v. Mike ve yine cihet-i karzdan altmış yedi guruş on para iddi‘â eden Pirinçci Yorgi v. Filibi nâm zimmîler meclis-i şer‘-i hatîrda medyûnları mesfûr Yorgaki zimmî muvâcehesinde mersûm Yorgaki zimmînin kazzâz esnâfından Anaştaş v. Mavrodi nâm zimmî hazır olduğu hâlde mesfûr Yorgaki zimmetinde ber-vech-i muharrer bizim cem‘an bin beş yüz altmış dört buçuk guruş alacak hakkımız olup ve mesfûrun bizlerden mâ‘adâ on dört nefer ma‘lûmü’l-esâmî kimesnelere dahi kırk bin üç yüz yirmi dört guruş on para düyûn-ı müteferrika-i bakıyesi olmağla ol vechile cem‘an bâlâda zikrolunduğu üzere düyûn-ı bakıyesi kırk bir bin sekiz yüz seksen sekiz guruş otuz paraya bâliğ olup medyûnumuz mesfûrun esnâ-yı ticâretde verdiği akçe güzeştesi ve gerek dâyinleri olan tüccârdan gālî bahâ ile iştirâ eylediği <> şalların kıymetleri mevsimlerine nazaran tenzîl bulmak takrîbi ve bâ-husûs zimemâtının bir mikdârı mümteni‘ü’l-husûl olması sebebiyle ticâ[re]ti husûsunda sekte vâki‘ olup düyûn-ı kesîreye dûçâr olduğu ma‘lûmumuz olduğundan medyûnumuz mesfûrun el-yevm Âsitâne-i aliyyede ve gerek medîne-i İzmir ve Mısr-ı Kāhire ve Ru[m]eli câniblerinde ve Eflak ve Boğdan memleketlerinde ma‘lûmü’l-esâmî kimesneler zimmetlerinde cem‘an alacağı olan zimemâtı otuz üç bin guruşa resîde olup def‘aten tahsîli müte‘assir olduğundan zimem-i mezkûreyi erbâbından ceste ceste lede’t-tahsîl bizimle sâir dâyinleri beynlerinde alâ-tarîkı’l-guremâ tevzî‘ ve tahsîl olunarak edâ ve îfâya bundan akdemce mesfûr Yorgaki zimmî müte‘ahhid ve hâzır-ı mersûm Kazzâz Anaştaş zimmî dahi zimem-i mezkûrdan tahsîl olundukça makbûzdan ber-vech-i muharrer her birimize edâ etmek üzere kefîl olup lâkin zimem-i mezkûre henüz tahsîl olunamadığına mebnî düyûn-ı bâkī-i mezkûreyi edâ mümkün olamadığı yakīnen meczûmumuz olmağla medyûnumuz mesfûr zimem-i [77a] mezkûresini tahsîlle düyûn-ı bâkī-i mezkûresini işbu sene-i mübârekeden beher sene her birimize südüsünü vererek altı sene tamamına dek mukāssatan edâ ve îfâ etmek üzere bizden istimhâl etmekle biz dahi rızâmızla medyûnumuz mesfûru vech-i meşrûh üzere imhâl ve tecîl eyledik, dediklerinde ol dahi bâlâda tafsîl olunduğu üzere mebâliğ-ı muharrere-i merkūme zimmetinde mesfûrûna sahîhan deyni olduğunu ikrâr ve i‘tirâf ve hâzır-ı mersûm Anaştaş zimmî dahi ber-vech-i muharrer zimem-i mezkûreden kabzla edâ etmek üzere kefâletini tasdîk edip zimem-i mezkûreyi tahsîl birle taksîtleri hulûlünde dâyinleri mesfûrûna edâ ve îfâ-yı deyne müte‘ahhidler olup ve mesfûrun zimem-i bâkī-i mezkûresinden mâ‘adâ ism[i] mâl ıtlâk olunur nesnesi olmayıp mu‘dim ve mu‘sir olduğu vukūf-ı tâmları olan Pandeli v. Kayuti ve Sotiri v. Paskal ve Serkiz v. Kirkor ve Yanako v. Sarandi ve Kirkor v. Ovannes ve Kosti v. Anton ve Sava v. Bali ve Ligori v. Hristo ve Anesti v. İstefan ve Yorgi v. Manol ve Nikola v. Mavrodi nâm zimmîler ihbârlarıyla zâhir ü mütehakkık olduğundan fîmâ-ba‘d medyûn-ı mesfûr düyû[n-ı] bâkī-i mezkûresini dâyinleri merkūmûna minvâl-i meşrûh üzere altı sene tamamına değin taksîtleri hulûlünde ceste ceste edâ ve îfâ birle dâyinleri merkūmûn taraflarından def‘aten mutâlebe ve ahz ü habs teklîfiyle te‘addî ve rencîde olunmamak bâbında istihkâmını hâvî bâlâsı tuğrâ-yı garrâ-yı cihân-dârânemle müzeyyen bir kıt‘a emr-i âlî-şânım sudûrunu istid‘â ve istirhâm eylediğini sen ki Mevlânâ-yı mûmâ-ileyh Mehmed Murad -zîdet fezâilühû-sun, i‘lâm etmenle i‘lâmın mûcebince amel olunmak fermânım olmağın imdi sen ki Mevlânâ-yı mûmâ-ileyhsin, ber-vech-i muharrer medyûn-ı mesfûr düyûn-ı bâkī-i mezkûresini dâyinleri merkūmûna altı sene tamamına değin edâ ettirilmek ve dâyinleri taraflarından def‘aten mutâlebe ve ahz ü habs teklîfiyle te‘addî ve rencîde ettirilmemek bâbında fermân-ı âlî-şânım sâdır olmuşdur. Buyurdum ki: Hükm-i şerîfimle vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından hazer ve mücânebet eyleyesiz. Şöyle bilesiz alâmet-i şerîfe i‘timâd kılasız. Tahrîren fî-evâsıtı şehri Recebi’l-ferd li-sene ihdâ ve işrîn ve mieteyn ve elf. El-Kostantıniyyeti’l-mahrûse