İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 317 Hüküm no: 213 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bacacı Esnafı Kethudalığına Halil Usta’nın yerine Mustafa Usta’nın tayin edildiği Erbâb-ı istihkākdan işbu râfi‘-i tevkī‘-i refî‘ü’ş-şân-ı hâkānî kıdvetü’l-emâsil ve’l-akrân Mustafa Usta -zîde kadrühû- Dîvân-ı Hümâyûn’uma arzuhâl edip; İstanbul’da Bacacıyân esnâfının Kethudâsı olan Halil Usta umûr-ı esnâfı rü’yetden âciz olmağla rızâsıyla Kethudâlıkdan keff-i yed etmeğin şurût-ı nizâmlarına ârif ve cümlenin emîn ve muhtârı olduğuna binâen esnâf-ı mezbûra kethudâ nasb ve sâbıkā İstanbul Kādısı Emin Paşazâde Mehmed Emin -zîdet fezâilühû-nun imzâsıyla mümzâ bir kıt‘a hüccet-i şer‘iye i‘tâ olunmağla mûcebince tevcîh ve yedine berat-ı âlî-şânım verilmek bâbında inâyet ricâ ve zikrolunan Kethudâlık bin yüz kırk üç târihiyle Murad nâm kimesnenin üzerinde olup târih-i mezbûrdan beri kimesneye berat verildiğinin kaydı bulunmadığı Başmuhâsebe’den derkenâr olunmağın hüccet-i şer‘iye mûcebince tevcîh olunmak fermânım olmağın hakkında mezîd inâyet-i Pâdişâhânem zuhûra getirip bin iki yüz yirmi bir senesi Recebi’l-ferd’in [82b] gurresi târihiyle müverrah verilen ruûs-ı hümâyûnum mûcebince bu berat-ı hümâyûn-ı meserret-makrûnu verdim ve buyurdum ki: Mezbûr Mustafa Usta -zîde kadrühû- varıp merkūmun keff-i yedinden Kethudâlık-ı mezkûra mutasarrıf olup hizmet-i lâzımesin bî-kusûr mer‘î ve müeddâ kıldıkdan sonra işbu berat-ı âlî-şânıma mugāyir Kethudâlığı umûruna ve zabt u tasarrufuna taraf-ı âhardan vechen mine’l-vücûh ve sebeben mine’l-esbâb hiç ferd mâni‘ ve müzâhim olmayıp dahl ve ta‘arruz kılmayalar. Şöyle bileler; alâmet-i şerîfeme i‘timâd kılalar. Fi’l-yevmi’s-sâbi‘-aşer min-Recebi’l-ferd li-sene ihdâ ve işrîn ve mieteyn ve elf. Be-makām-ı Kostantıniyyeti’l-mahrûse