İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 319 Hüküm no: 217 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alışverişlerde kenarından kesilmiş altın para kullanılmaması ve emre uymayanların cezalandırılacağı Bâ-sah. İstanbul Kādısı Fazîletlü Efendi Der-aliyye’de ba‘zı erbâb-ı hiyel ve fesâd ecnâs-i meskûke dinârı kenarından kat‘ ile taşralarda ve husûsla Sûk-ı Sultânî’de ahz ü i‘tâya ictisâr ederek bu maddeyi re’sen bir ticâret addeyledikleri ve bu keyfiyet fukarâ-yı rustânın hasârını mûcib olduğundan gayri şîrâze-i nizâm-ı sikkeyi muhtell ü müşevveş eylediği zâhir ü âşikâr olmakdan nâşî bu maddenin külliyen men‘ u def‘i husûsuna irâde-i seniyye müte‘allik olmağla imdi fîmâ-ba‘d bu makūle kâr-ı memnû‘[a] cesâret eden ve maktû‘ altını alıp veren her kim olur ise olsun tedîbât-ı lâyıkaları icrâ olunacağını iktizâ edenlere ifâde ve tefhîme müsâra‘at birle işbu kâr-ı nâ-bercânın külliyen men‘ u def‘i esbâbının istihsâline ihtimâm [ve] dikkat eyleyesiz deyü. Fî 7 S sene 1222