İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 321 Hüküm no: 219 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahve narhı Bâ sah. İstanbul Kādısı Fazîletlü Efendi Dersa‘âdet’de olan kahveci esnâfı bu esnâda kemâl-i tama‘-ı hâmlarından nâşî yirmi beş dirhem kahveyi kırkar, kırk beşer, ellişer para ve dahi ziyâdeye bey‘ u füruhta cesâret eyledikleri âşikâr ve bu keyfiyet sekene-i Dârü’s-saltanati’s-seniyye’ye mûcib-i rahne ve hasâr olduğundan bu husûs bir taht-ı râbıtaya idhâl ile ibâdullâhın dûçâr oldukları rahne ve mazârdan vikāyeleri lâzımeden olmakdan nâşî el-hâletü hâzihî mevcûd olan çiğ kahvenin beher kıyyesi on bir guruş beş paraya kahveci esnâfına tevzî‘ ettirilecek olmağla bir kıyye çiğ kahveden ba‘de’t-tahmîs beher kâğıdı yirmi beş dirhem olmak üzere on üç kâğıd hâsıl olup beher kâğıdı otuz altışar paraya ibâdullâha bey‘ u füruht olunduğu sûretde beher kıyyesinden harc-ı tahmîs ve masârif-i mu‘tâdesi olan dokuzar para fürû-nihâde olundukdan sonra döğülmüş bir kıyye kahveden esnâf-ı merkūmeye on dört para fâide hâsıl olacağı zâhir ve esnâf-ı merkūmenin zikrolunan bahâdan ziyâdeye bey‘ u füruht eylemeleri hadd-i insâf ve i‘tidâlden hâric idiği bedîhî ve bâhir olmağla imdi esnâf-ı merkūmeyi huzûrunuza ihzâr ve keyfiyeti kendilere gereği gibi ifâde ve iş‘âr edip fîmâ-ba‘d tafsîl ü beyân olunduğu üzere beher kıyyesinde tahsîs olunan on dörder para kâra kanâ‘at ile yirmi beşer dirhem kahveyi otuz altı paradan ziyâdeye bey‘ u füruht etmemelerini ve narh-ı mezkûrdan ziyâdeye füruhta cesâret ederi veyâhûd ziyâdeye füruhta medâr olmak fikriyle çiğ kahve saklayıp gizlü gizlü mu‘tâd-ı kadîmleri üzere narhdan ziyâdeye füruht ederi olur ise o makūlelerin tedîbi yalnız ta‘zîr veyâhûd nefy ile iktifâ olunmayıp haklarında âhar gûne mu‘âmele olunacağını bî-iştibâh bilmeleri için gûş-ı hûşlarına ilkā ve telkīn ederek bu râbıtanın fîmâ-ba‘d vikāyesine siz dahi dâimâ nezâret eyleyesiz deyü buyruldu. Fî 22 S sene 1222